فوتو: ريا نوۆوستي / الەكسەي نيكولسكي
بۇرىن رەسەي پراۆوسلاۆ شىركەۋى باسشىسى پاتريارح كيريللدەن كەيىنگى ەڭ ىقپالدى تۇلعالاردىڭ ءبىرى سانالعان ءدىن قىزمەتكەرى ميتروپوليت يلاريون چەحيانىڭ كارلوۆى ۆارى قالاسىندا ۇستالدى. ونىڭ كولىگىنەن اق ءتۇستى زات سالىنعان كونتەينەرلەر تابىلعان. بۇل تۋرالى يلاريوننىڭ Telegram-ارناسىندا جاريالانعان، دەپ حابارلايدى “ادىرنا”.
«ونىڭ قۇرامى، شىعۋ تەگى جانە سيپاتى تەك قۇزىرەتتى ساراپتاما ارقىلى انىقتالۋى ءتيىس»، - دەلىنگەن حابارلامادا.
ءميتروپوليتتىڭ قورعاۋشىلارى ونىڭ قانداي دا ءبىر زاڭسىز ەسىرتكى اينالىمىنا قاتىسى بارىن تولىقتاي تەرىسكە شىعاردى. يلاريوننىڭ ءوزى بۇل جاعدايدى ارانداتۋشىلىق دەپ باعالاپ وتىر.
«مەن ەشقاشان زاڭسىز ەسىرتكى اينالىمىنا قاتىسقان ەمەسپىن جانە قازىر دە قاتىسىم جوق. ءدىن قىزمەتكەرى رەتىندە مۇنداي ايىپتاۋدىڭ ءوزى — مۇلدە جالعان»، – دەپ مالىمدەدى ول.
سونىمەن قاتار، ول وقيعانى تاۋەلسىز ءارى زاڭ اياسىندا تولىق تەكسەرۋدى تالاپ ەتكەن.
يلاريوننىڭ شىن ەسىمى — گريگوري الفەەۆ. ول ۇزاق جىلدار بويى رەسەي پراۆوسلاۆ شىركەۋىنىڭ سىرتقى بايلانىستار ءبولىمىن باسقارعان جانە حالىقارالىق دەڭگەيدەگى نەگىزگى وكىلدەرىنىڭ ءبىرى بولعان.
رەسەيدىڭ ۋكرايناعا تولىق اۋقىمدى باسىپ كىرۋى باستالعاننان كەيىن ول بۋداپەشتتەگى ۆەنگريا ەپارحياسىنىڭ باسشىسى قىزمەتىنە اۋىستىرىلدى. الايدا كەيىن ونىڭ بۇرىنعى كومەكشىسى ءميتروپوليتتى سەكسۋالدىق قىسىم كورسەتتى دەپ ايىپتاعان سوڭ، يلاريون كارلوۆى ۆارىداعى قىزمەتكە جىبەرىلگەن.
چەحيا جانە ۆەنگريا مەدياسى سوڭعى جىلدارى يلاريوننىڭ رەسەي ارنايى قىزمەتتەرىمەن ىقتيمال بايلانىستارى تۋرالى بىرنەشە رەت جازعان.
اتاپ ايتقاندا، فەدەرالدىق قاۋىپسىزدىك قىزمەتىنىڭ (فقق) قىزمەتكەرلەرى قولداناتىن قارۋمەن وق اتىپ جاتقان ۆيدەوسى تاراعان. چەحيالىق Deník N باسىلىمىنىڭ مالىمەتىنشە، ءميتروپوليتتىڭ بۇرىنعى سەرىكتەسى بۇل ۆيدەو ماسكەۋدەگى فقق شتاب-پاتەرىندە تۇسىرىلگەنىن ايتقان.
قازىرگى ۋاقىتتا چەح قۇقىق قورعاۋ ورگاندارى تابىلعان زاتتارعا ساراپتاما جۇرگىزىپ جاتىر. تەرگەۋ ناتيجەلەرى ازىرگە جاريالانعان جوق.
