باتىس قازاقستان وبلىسى تۇرعىندارى رەسەيمەن شەكاراداعى «سىرىم» وتكىزۋ بەكەتى ماڭىندا بەلگىسىز ۇشقىشسىز اپپاراتتاردى بايقاعانىن حابارلادى. بۇل تۋرالى «ۋرالسكايا نەدەليا» جازدى، دەپ حابارلايدى “ادىرنا”.
باسىلىم مالىمەتىنشە، جەرگىلىكتى تۇرعىندار درونداردى ەكى ءتۇن قاتارىنان كورگەن. كۋاگەرلەردىڭ ايتۋىنشا، اپپاراتتار سامارا وبلىسى جاعىنان ۇشىپ كەلگەن، ال اسپاندا ءبىر مەزەتتە ونعا جۋىق نىسان بايقالعان.
تۇرعىنداردىڭ ءبىرى بەلگىسىز اپپاراتتاردىڭ وتكىزۋ بەكەتى مەن شەكارا زاستاۆاسىنىڭ ۇستىنەن ۇشقانىن ايتتى. ونىڭ سوزىنشە، مۇنداي جاعداي بىرنەشە كۇننەن بەرى قايتالانىپ جاتىر.
الەۋمەتتىك جەلىلەردەگى جاريالانىمداردان كەيىن جاعدايعا قازاقستان رەسپۋبليكاسىنىڭ قورعانىس مينيسترلىگى پىكىر ءبىلدىردى. ۆەدومستۆو قازاقستاننىڭ اۋە كەڭىستىگىن بۇزۋ فاكتىلەرى تىركەلمەگەنىن مالىمدەدى.
«قازاقستان رەسپۋبليكاسىنىڭ اۋە كەڭىستىگىن بۇزۋ دەرەكتەرى تىركەلگەن جوق. جاعداي ءتيىستى قىزمەتتەردىڭ باقىلاۋىندا»، – دەپ حابارلادى مينيسترلىك.
سونىمەن قاتار، رەسمي تۇردە بايقالعان نىسانداردىڭ شىنىمەن ۇشقىشسىز اپپارات بولعانى نەمەسە قازاقستان اۋە كەڭىستىگىن بۇزعانى راستالعان جوق. ازاماتتارعا جالعان اقپارات تاراتپاۋ جونىندە ەسكەرتۋ جاسالدى.
سونىمەن بىرگە قازاقستاندا درونداردىڭ قۇلاۋ وقيعالارى ارا-تۇرا تىركەلىپ تۇرادى. ماسەلەن، 2026 جىلعى 26 ناۋرىزدا باتىس قازاقستان وبلىسى اۋماعىنان ۇشقىشسىز ۇشۋ اپپاراتى تابىلعان. ال 29 ناۋرىزدا اتىراۋ وبلىسى اۋماعىنان دا بپلا بولشەكتەرى انىقتالعان.
ايتا كەتەيىك، بۇل وڭىردەگى مۇنداي العاشقى جاعدايلار ەمەس. «ۋرالسكايا نەدەليا» باسىلىمىنىڭ جازۋىنشا، تەك باتىس قازاقستان وبلىسىنىڭ وزىندە انىقتالعان دروندار سانى وننان اسقان.
29 ءساۋىر كۇنى تاعى ءبىر ۇشقىشسىز اپپارات اۋىل ماڭىنداعى جولدىڭ جانىنا قۇلاعان. جاريالانعان كادرلاردا قۇلاعان جەردىڭ شامامەن 150–200 مەتر اۋماقتا جىرتىلىپ كەتكەنى جانە ءتۇتىن بايقالعانى كورىنەدى.
