Batys Qazaqstan oblysy tūrǧyndary Reseimen şekaradaǧy «Syrym» ötkızu beketı maŋynda belgısız ūşqyşsyz apparattardy baiqaǧanyn habarlady. Būl turaly «Uralskaia nedelia» jazdy, dep habarlaidy “Adyrna”.
Basylym mälımetınşe, jergılıktı tūrǧyndar drondardy ekı tün qatarynan körgen. Kuägerlerdıŋ aituynşa, apparattar Samara oblysy jaǧynan ūşyp kelgen, al aspanda bır mezette onǧa juyq nysan baiqalǧan.
Tūrǧyndardyŋ bırı belgısız apparattardyŋ ötkızu beketı men şekara zastavasynyŋ üstınen ūşqanyn aitty. Onyŋ sözınşe, mūndai jaǧdai bırneşe künnen berı qaitalanyp jatyr.
Äleumettık jelılerdegı jariialanymdardan keiın jaǧdaiǧa Qazaqstan Respublikasynyŋ Qorǧanys ministrlıgı pıkır bıldırdı. Vedomstvo Qazaqstannyŋ äue keŋıstıgın būzu faktılerı tırkelmegenın mälımdedı.
«Qazaqstan Respublikasynyŋ äue keŋıstıgın būzu derekterı tırkelgen joq. Jaǧdai tiıstı qyzmetterdıŋ baqylauynda», – dep habarlady ministrlık.
Sonymen qatar, resmi türde baiqalǧan nysandardyŋ şynymen ūşqyşsyz apparat bolǧany nemese Qazaqstan äue keŋıstıgın būzǧany rastalǧan joq. Azamattarǧa jalǧan aqparat taratpau jönınde eskertu jasaldy.
Sonymen bırge Qazaqstanda drondardyŋ qūlau oqiǧalary ara-tūra tırkelıp tūrady. Mäselen, 2026 jylǧy 26 nauryzda Batys Qazaqstan oblysy aumaǧynan ūşqyşsyz ūşu apparaty tabylǧan. Al 29 nauryzda Atyrau oblysy aumaǧynan da BPLA bölşekterı anyqtalǧan.
Aita keteiık, būl öŋırdegı mūndai alǧaşqy jaǧdailar emes. «Uralskaia nedelia» basylymynyŋ jazuynşa, tek Batys Qazaqstan oblysynyŋ özınde anyqtalǧan drondar sany onnan asqan.
29 säuır künı taǧy bır ūşqyşsyz apparat auyl maŋyndaǧy joldyŋ janyna qūlaǧan. Jariialanǧan kadrlarda qūlaǧan jerdıŋ şamamen 150–200 metr aumaqta jyrtylyp ketkenı jäne tütın baiqalǧany körınedı.
