Almaty Super Ski جوباسىن قوعامدىق تالقىلاۋ بارىسىندا قر عىلىم جانە جوعارى ءبىلىم مينيسترىلىگىنىڭ وكىلى ەرجان كۇلدەەۆ عىلىمي زەرتتەۋلەردىڭ ناتيجەسىمەن ءبولىستى.
ونىڭ ايتۋىنشا، جوبا بويىنشا تاۋداعى قار جامىلعىسىنىڭ جاعدايى، قار قورى جانە كليماتتىق سيپاتتامالارى زەرتتەلگەن. زەرتتەۋ ناتيجەسى بويىنشا كەيىنگى 10 جىلدا قار جامىلعىسىنىڭ ايتارلىقتاي وزگەرىسى بايقالماعان.
سونداي-اق جوبانىڭ مۇزدىقتارعا ىقتيمال اسەرى قاراستىرىلعان. ۇسىنىلعان دەرەكتەرگە سايكەس، مۇزدىقتار زەرتتەلىپ وتىرعان اۋماقتىڭ سىرتىندا ورنالاسقان. سوندىقتان جوبانى ىسكە اسىرۋ مۇزدىقتاردىڭ جاعدايىنا تىكەلەي اسەر ەتپەيدى.
ەرجان كۇلدەەۆ قۇرىلىس جۇرگىزىلەتىن اۋماقتا زاڭناماعا سايكەس الدىن الا ارحەولوگيالىق قازبا جۇمىستارى جۇرگىزىلەتىنىن اتاپ ءوتتى.
- بارلىق ۋچاسكەلەر تولىق زەرتتەلىپ، قۇجاتتاندىرىلعاننان كەيىن عانا قۇرىلىس-مونتاجداۋ جۇمىستارىن جۇرگىزۋگە رۇقسات بەرىلەدى، - دەدى ول.
ونىڭ ايتۋىنشا، تۇراقتى ەكولوگيالىق باقىلاۋ بولعان جاعدايدا جوبانى ىسكە اسىرۋ ەكولوگيالىق تۇرعىدان رۇقسات ەتىلەدى.
- جۇرگىزىلگەن زەرتتەۋ ناتيجەلەرى تابيعاتتى قورعاۋ تالاپتارى مەن تۇراقتى مونيتورينگ شارالارى ساقتالعان جاعدايدا جوبانى ىسكە اسىرۋ ءۇشىن قاراستىرۋعا بولاتىنىن كورسەتەدى، - دەدى ول.
