كوكشەتاۋ قالاسىنداعى «كوكشەتاۋ» مادەنيەت سارايىندا مادەنيەت جانە ونەر قىزمەتكەرلەرىنىڭ كاسىبي مەرەكەسىنە ارنالعان سالتاناتتى ماراپاتتاۋ ءراسىمى مەن اۋقىمدى گالا-كونتسەرت ءوتتى.
ايماقتىڭ تۇكپىر-تۇكپىرىنەن كەلگەن جۇزدەگەن ونەرپازدار، مۋزىكانتتار مەن قولونەر شەبەرلەرى باس قوسقان كەشتىڭ باستى وقيعاسى – مادەنيەت سالاسىنىڭ ۇزدىكتەرىن ۆەدومستۆولىق ناگرادالارمەن ماراپاتتاۋ بولدى.
مەرەكەلىك كەش العاشقى مينۋتتاردان-اق كورەرمەندەردى ەرەكشە اتموسفەراعا بولەدى. مادەنيەت سارايىنىڭ فويەسىندە ۇيىمداستىرىلعان Art-اللەيادا تالانتتى سۋرەتشىلەردىڭ تۋىندىلارى مەن قولونەر شەبەرلەرىنىڭ بىرەگەي جۇمىستارى كوپشىلىك نازارىنا ۇسىنىلدى. بۇل كورمە ساحنا تورىندە جالعاساتىن ونەر مەرەكەسىنىڭ جارقىن باستاۋى ىسپەتتى بولدى.
كەش شىمىلدىعى دينا نۇرپەيىسوۆانىڭ ايگىلى «ناۋاي» كۇيىن جاس دومبىراشىلار ءانسامبلىنىڭ ورىنداۋىمەن اشىلدى. ونەرپازداردىڭ شەبەر ورىنداۋى كورەرمەندەردى ءتانتى ەتتى. بۇدان كەيىن ەرەيمەنتاۋ اۋدانىنان كەلگەن قوبىزشىلار ءانسامبلى، جەتىگەنشىلەر ۇجىمى جانە قازاق حالىق ۇلتتىق اسپاپتار وركەسترى قازاقتىڭ ءتول مۋزىكالىق اسپاپتارىنىڭ اسەم اۋەنىن پاش ەتتى.
«مادەنيەت – ۇلتتىڭ جانى، ال ونەر – ونىڭ رۋحاني ءۇنى. مادەنيەت قىزمەتكەرلەرىنىڭ قاجىرلى ەڭبەگىنىڭ ارقاسىندا ۇلتتىق قۇندىلىقتار، تاريحي جادى جانە ۇرپاقتار ساباقتاستىعى ساقتالىپ كەلەدى. بۇگىندە اقمولا ءوڭىرىنىڭ ونەر مايتالماندارى قازاق مادەنيەتىن حالىقارالىق دەڭگەيدە تانىتىپ، قوعامنىڭ رۋحاني بىرلىگىن نىعايتۋعا زور ۇلەس قوسىپ ءجۇر»، – دەدى اقمولا وبلىسىنىڭ اكىمى مارات احمەتجانوۆ.
كەشتىڭ نەگىزگى بولىگىنىڭ ءبىرى – سالتاناتتى ماراپاتتاۋ ءراسىمى بولدى. «مادەنيەت سالاسىنىڭ ۇزدىگى» توسبەلگىسىمەن 11 سالا مامانى ماراپاتتالدى. اتاپ ايتقاندا، بۋراباي اۋداندىق مادەنيەت ءۇيىنىڭ ديرەكتورى ايسۋلۋ جامانتىقوۆا، «سازدى اۋەن» فولكلورلىق ءانسامبلىنىڭ جەتەكشىسى امانگەلدى رايحانۇلى، كوكشەتاۋ قالاسى تاريحى مۋزەيىنىڭ ديرەكتورى الماس تەمىرباي، سونداي-اق سالتانات تاجبەنوۆا، سۆەتلانا گوربان، باۋىرجان نۇرىمبەتوۆ، اسەم يبراەۆا، گۇلميرا زاراپوۆا، بەيبىت كەشۋ، ۆيكتوريا مانۋكيان جانە مارال جاقىپوۆا ماراپاتقا يە بولدى.
«مەن بۇل سالادا 20 جىلدان استام ۋاقىت ەڭبەك ەتىپ كەلەمىن. بۇگىن مادەنيەت قىزمەتكەرلەرى كۇنى ءبىزدىڭ ەڭبەگىمىز جوعارى باعالانىپ جاتىر. “مادەنيەت سالاسىنىڭ ۇزدىگى” ناگراداسىن الۋ – مەن ءۇشىن ۇلكەن قۋانىش. مۋزەي سالاسىندا ەڭبەك ەتە وتىرىپ، مادەني مۇرانى بولاشاق ۇرپاققا جەتكىزۋگە ءوز ۇلەسىمىزدى قوسا بەرەمىز»، – دەدى كوكشەتاۋ قالاسى تاريحى مۋزەيىنىڭ عىلىمي قىزمەتكەرى گۇلميرا زاراپوۆا.
سونىمەن قاتار، نۇربولات المەنوۆ پەن رۋستام جاحين «قۇرمەت گراموتاسىمەن» ماراپاتتالدى. ال ايان قاجىباي، داۋلەت مۇحتارحان جانە انارا ساتىباەۆا سالالىق مينيسترلىكتىڭ العىس حاتتارىنا يە بولدى.
«بارشا ارىپتەستەرىمدى كاسىبي مەرەكەمەن قۇتتىقتايمىن. بۇگىنگى گالا-كونتسەرت – ءبىز ءۇشىن ۇلكەن مەرەكە. ادەبيەت جانە ونەر مۋزەيىندە 15 جىلدان بەرى ەڭبەك ەتىپ كەلەمىن. وسى ۋاقىت ىشىندە ءوڭىرىمىزدىڭ مادەنيەتى مەن ونەرى ايتارلىقتاي دامىدى. بۇل سالا ءبىز ءۇشىن وتە قىمبات ءارى جاقىن. ماراپات العان بارلىق ارىپتەستەرىمدى شىن جۇرەكتەن قۇتتىقتايمىن»، – دەدى ادەبيەت جانە ونەر مۋزەيىنىڭ عىلىمي قىزمەتكەرى نۇربولات المەنوۆ.
كوكشەتاۋدا وتكەن بۇل مەرەكەلىك كەش مادەنيەت پەن ونەردىڭ اقمولا وبلىسىنىڭ قوعامدىق ومىرىندە ايرىقشا ورىن الاتىنىن تاعى ءبىر مارتە دالەلدەدى. سونداي-اق وسى سالانىڭ دامۋىنا ۇلەس قوسىپ جۇرگەن مامانداردىڭ ەڭبەگى ءاردايىم جوعارى باعالانىپ، قولداۋ تاباتىنىن كورسەتتى.
