شىمكەنت قالاسىندا الەۋمەتتىك ينفراقۇرىلىمدى دامىتۋ جانە ەرەكشە كۇتىمدى قاجەت ەتەتىن ادامدارعا قولايلى ورتا قالىپتاستىرۋ باعىتىنداعى اۋقىمدى جوبالار جۇيەلى جۇزەگە اسىرىلىپ كەلەدى.
سونىڭ ءبىرى – مەملەكەت باسشىسىنىڭ تاپسىرماسىنا سايكەس سالىنىپ جاتقان 150 ورىندىق زاماناۋي وڭالتۋ ورتالىعى.
2024 جىلدىڭ جەلتوقسان ايىندا باستالعان قۇرىلىس بۇگىندە قارقىندى جۇرگىزىلۋدە. بوزارىق شاعىناۋدانىندا ورنالاسقان كەشەننىڭ جالپى اۋماعى 5,3 گەكتاردى قۇرايدى. جوبا 5 بلوكتان تۇرادى جانە حالىقارالىق تالاپتارعا ساي جابدىقتالماق.
ورتالىقتا ءى-ءىى توپتاعى مۇگەدەكتىگى بار ازاماتتارعا جارتىلاي ستاتسيونارلىق جاعدايدا ارناۋلى الەۋمەتتىك قىزمەتتەر كورسەتىلەدى. بۇل قىزمەتتەر وسى ساناتتاعى ازاماتتاردىڭ ءومىر ساپاسىن ارتتىرۋعا، ولاردىڭ قوعامعا بەيىمدەلۋىنە جانە الەۋمەتتىك قولداۋدى جان-جاقتى قامتاماسىز ەتۋگە باعىتتالعان.
كەشەن اۋماعىندا سپورت زالى، ەمدىك-ساۋىقتىرۋ باسسەينى، اكت زالى، ءۇش قاباتتى وڭالتۋ كورپۋسى، كەڭ اسحانا، ەكى قاباتتى ستاتسيونار جانە قوسىمشا تەحنيكالىق نىساندار قاراستىرىلعان.
قازىرگى تاڭدا قۇرىلىستىڭ 60 پايىزى اياقتالدى. بارلىق جۇمىس ءتيىستى تالاپتار مەن ساپا ستاندارتتارىنا سايكەس جۇرگىزىلۋدە. نىسان قۇرىلىسىندا 262 جۇمىسشى ەڭبەك ەتەدى.
جوبانى 2026 جىلدىڭ جەلتوقسان ايىندا اياقتاپ، پايدالانۋعا بەرۋ جوسپارلانىپ وتىر. بۇل باستاما شىمكەنتتىڭ الەۋمەتتىك جاۋاپكەرشىلىگى جوعارى مەگاپوليس رەتىندەگى الەۋەتىن ارتتىرىپ، قالا تۇرعىندارى ءۇشىن قولايلى ءارى قامقور ورتا قالىپتاستىرۋعا سەرپىن بەرەدى.
