بەلگىلى عالىم، حالىقارالىق دەڭگەيدەگى قارجىگەر سانجار اسپاندياروۆ 59 جاسقا قاراعان شاعىندا ومىردەن ءوتتى، دەپ حابارلايدى «ادىرنا» ءتىلشىسى.
ول 1968 جىلدىڭ 10 اقپانىندا دۇنيەگە كەلگەن. اتاسى ءبىلال اسپاندياروۆ تاريحشى، لينگۆيست جانە اعارتۋشى بولىپ، ءومىرىن ءبىلىمدى ساقتاۋ مەن ونى ۇرپاققا جەتكىزۋگە ارناعان. اكەسى سەرىك اسپاندياروۆ — فيزيك-عالىم، جوعارى قىسىمدى الماز كامەراسىنىڭ جاساۋشىسى، عىلىمعا قوسقان ۇلەسى قازاقستاننان تىس جەرلەردە دە كەڭىنەن تانىلعان تۇلعا.
تانىمال ماتەماتيك الماتى قالاسىنداعى №56 ورتا مەكتەپتى ون ءتورت جاسىندا ءبىتىرىپ، بەلگىلى پەداگوگ ارحيمەد ىسقاقوۆتىڭ سىنىبىندا وقىعان. ون بەس جاسىندا-اق ونىڭ جاس ماتەماتيك رەتىندەگى قابىلەتى تۋرالى دەرەكتى فيلم تۇسىرىلگەن. جوعارى ءبىلىمدى ول م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ مەحانيكا-ماتەماتيكا فاكۋلتەتىندە الىپ، ونى ۇزدىك بىتىرگەن. ودان كەيىن وقۋىن فرانتسيادا، École normale supérieure دوكتورانتۋراسىندا جالعاستىرىپ، سوربوننادا دوكتورلىق ديسسەرتاتسيا قورعاعان العاشقى قازاق بولدى. ديسسەرتاتسياسىن قورعاعاننان كەيىن ول سوربوننادا وقىتۋشىلىق قىزمەتتە قالىپ، وسى ۋنيۆەرسيتەتتە ءدارىس وقىعان قازاقستاننىڭ العاشقى وكىلى اتاندى.
جاپونيا، فرانتسيا جانە قىتايدىڭ مەملەكەتتىك ستيپەنديالىق باعدارلامالارىنىڭ يەگەرى رەتىندە سانجار اسپاندياروۆ جاپونيا، ەۋروپا جانە امەريكانىڭ جەتەكشى ۋنيۆەرسيتەتتەرىندە عىلىمي-پەداگوگيكالىق قىزمەت اتقاردى. ول بەس ءتىلدى ەركىن مەڭگەرگەن.
سانجار اسپاندياروۆتىڭ اناليتيكالىق جانە ستراتەگيالىق قابىلەتى قارجى سالاسىندا تولىق اشىلدى. ول لوندونداعى Credit Suisse جانە Citigroup كومپانيالارىندا، سونداي-اق ون جىلدان استام ۋاقىت بويى Barclays Capital بانكىندە جۇمىس ىستەدى.
