ورال قالاسىندا «KAZAKH INVEST» ۇك» اق قولداۋىمەن ەۋرازيالىق يندۋستريالىق-لوگيستيكالىق حابتىڭ ىرگەتاسىن قالاۋ ءراسىمى ءوتتى. جوبانىڭ باستاماشىسى – Eurasia Holding Group قۇرامىنا كىرەتىن «Jinone Excellence Investment» جشس.
ماڭىزدى نىسانداعى قۇرىلىستىڭ باستالۋىنا وراي وتكەن سالتاناتتى راسىمگە وبلىس اكىمى ناريمان تورەعاليەۆ قاتىستى. ايماق باسشىسى پرەزيدەنتتىڭ تىكەلەي تاپسىرماسىمەن ايماقتاعى باسىم ەكونوميكالىق سالالاردى دامىتۋ ءۇشىن ينۆەستورلارعا قاجەتتى ينفراقۇرىلىم مەن دايىن زاماناۋي ونەركاسىپتىك الاڭدار جاساقتالىپ جاتقانىن جەتكىزدى.
- باتىس قازاقستان وبلىسى – ەلىمىزدىڭ باتىس قاقپاسى، ينۆەستيتسيالىق الەۋەتى جاعىنان تارتىمدى ايماقتاردىڭ ءبىرى. 2023-2025 جىلدارى نەگىزگى كاپيتالعا شامامەن 2,3 تريلليون تەڭگە ينۆەستيتسيا تارتىلدى. 2026 جىلدىڭ ءبىرىنشى توقسانىندا عانا ينۆەستيتسيا كولەمى 22,4%-عا ءوسىپ، 135 ميلليارد تەڭگەدەن استى. بۇل كورسەتكىشتەر ايماق ەكونوميكاسىنا بيزنەستىڭ جوعارى سەنىمدىلىگىن كورسەتەدى. كەيىنگى 3 جىلدا 4,9 ميلليارد دوللاردان استام تىكەلەي شەتەلدىك ينۆەستيتسيا تارتىلدى. بۇل كورسەتكىش بويىنشا ءوڭىر رەسپۋبليكا ايماقتارى اراسىندا جەتەكشى ورىن الادى، - دەدى ناريمان تورەعاليەۆ.
قحر-دىڭ اقتوبە قالاسىنداعى باس كونسۋلىنىڭ ورىنباسارى چجان نان ماڭىزدى جوبا ەكى ەل اراسىنداعى دوستىق قاتىناس پەن وندىرىستىك ىنتىماقتاستىقتى دامىتىپ، جاڭا دەڭگەيگە شىعارۋعا سەرپىن بەرەتىنىن اتاپ ءوتتى. «KAZAKH INVEST» ۇك» اق باسقارماسىنىڭ توراعاسى سۇلتانعالي كەنجەقۇلوۆ جوبالاردى ىسكە اسىرۋدىڭ بارلىق كەزەڭىندە ينۆەستورلارعا كەشەندى قولداۋ كورسەتىلەتىنىن مالىمدەدى.
جاڭا جوبا ورال قالاسىندا 20 گەكتار اۋماقتا ىسكە اسىرىلادى. ينۆەستيتسيالاردىڭ جالپى كولەمى 130 ملن اقش دوللارىن قۇرايدى. كەشەن قۇرامىنا جىلىنا 30 000 تونناعا دەيىن ءونىم شىعاراتىن بولات كونسترۋكتسيالارى زاۋىتى، جىلىنا 60 000 داناعا دەيىن قۇرىلىس قالىپتارىن وندىرەتىن زاۋىت، سونداي-اق جىل سايىن 250 000 بۋحتاعا دەيىن BV ءتيپتى كابەل شىعاراتىن زاۋىت كىرەدى. نىساندى 2026 جىلدىڭ سوڭىندا پايدالانۋعا بەرۋ جوسپارلانعان. جوبانى ىسكە اسىرۋ ناتيجەسىندە 510 تۇراقتى جۇمىس ورنى اشىلادى.
حابتىڭ نەگىزگى ەلەمەنتى قىتايلىق ەلەكتروندىق كوممەرتسيا كومپانيالارىن، رەسەيلىك ترەيدەرلەر مەن ەۋروپالىق جۇك جونەلتۋشىلەردى قوسا العاندا، ءۇشىنشى تاراپتاردىڭ جۇكتەرىن ساقتاۋعا جانە وڭدەۋگە ارنالعان اشىق ۇلگىدەگى «ا» ءتيپتى كەدەن قويماسى بولادى. بۇل فورمات وڭىردەگى ءتيىمدى لوگيستيكانى قامتاماسىز ەتىپ، حالىقارالىق ساۋدانىڭ دامۋىنا سەرپىن بەرەدى.
جوبا قىتايدى، ورتالىق ازيانى، رەسەيدى، شىعىس ەۋروپا مەن ەۋروپالىق وداقتى بايلانىستىراتىن ەۋرازيالىق ونەركاسىپتىك سينەرگيا ءدالىزى ءۇشىن نەگىزگى حولدينگتىك پلاتفورمانى قالىپتاستىرۋعا باعىتتالعان. حالىقارالىق كولىك باعىتتارىنىڭ توعىسىندا ورنالاسقان ورال قالاسى ەاەو ەلدەرىنىڭ نارىقتارىنا تىكەلەي شىعاتىن زاماناۋي يندۋستريالىق-لوگيستيكالىق ورتالىق قالىپتاستىرۋ ءۇشىن ايتارلىقتاي الەۋەتكە يە.
