استانادا ءبىر توپ ەر ادام اقشا داۋىنا بايلانىستى ادام ۇرلاعانى ءۇشىن سوتتالدى. بۇل تۋرالى استانا پروكۋراتۋراسى مالىمدەدى، دەپ حابارلايدى "ادىرنا".
مالىمەتكە سايكەس، قىلمىس 2024 جىلدىڭ جەلتوقسان ايىندا بولعان.
سوت انىقتاعانداي، توپ مۇشەلەرىنىڭ ءبىرى جابىرلەنۋشىدەن ورىندالماعان قىزمەت ءۇشىن اقشا تالاپ ەتكەن. جانجال بارىسىندا ول كۇش قولدانىپ، جابىرلەنۋشىنى 80 مىڭ تەڭگەنى ءوز شوتىنا اۋدارۋعا ماجبۇرلەگەن.
كەيىن قاسكويلەر الدىن الا ءسوز بايلاسۋ ارقىلى جابىرلەنۋشىنى استانا قالاسىنىڭ اۋماعىندا كۇشتەپ الىپ كەتكەن. تەرگەۋ دەرەكتەرىنە سايكەس، قىلمىس كۇش قولدانۋ ارقىلى جانە پايداكۇنەمدىك ماقساتتا جاسالعان.
قىلمىستىق ءىس استانانىڭ اۋدانارالىق قىلمىستىق ىستەر جونىندەگى سوتىندا قارالدى. مەملەكەتتىك ايىپتاۋدى «سارىارقا» اۋدانىنىڭ پروكۋراتۋراسى قولدادى.
سوت تالقىلاۋى بارىسىندا سوتتالۋشىلاردىڭ كىناسى تولىق دالەلدەندى.
سوت ۇكىمىمەن بەس ايىپتالۋشى ادام ۇرلاعانى ءۇشىن 8 جىلعا باس بوستاندىعىنان ايىرىلدى. ال تاعى ءبىر ايىپتالۋشى ادام ۇرلاۋعا جاردەمدەسكەنى جانە ءوز بەتىنشە بيلىك جۇرگىزگەنى ءۇشىن 7 جىل 6 اي مەرزىمگە سوتتالدى.
قاداعالاۋ ورگانى قازاقستاندا ادام ۇرلاعانى ءۇشىن 15 جىلعا دەيىن باس بوستاندىعىنان ايىرۋ جازاسى كوزدەلگەنىن، ال ءوز بەتىنشە بيلىك جۇرگىزگەنى ءۇشىن 7 جىلعا دەيىن جازا قاراستىرىلعانىن ەسكە سالدى.
