26 مامىردا قازاقستانداعى ەڭ ءىرى مۇناي كەن ورنى – تەڭىزدەگى تاۋلىكتىك مۇناي ءوندىرۋ كولەمى 125 مىڭ توننادان 5–10 مىڭ تونناعا دەيىن تومەندەدى. بۇل تۋرالى Reuters اگەنتتىگى جازدى، دەپ حابارلايدى «ادىرنا» ءتىلشىسى.
بۇل جاعدايعا وندىرىستىك اقاۋ سەبەپ بولعان. سونداي-اق تەڭىزدەن قازاقستان مۇنايىنىڭ شامامەن 80 پايىزى ەكسپورتتالاتىن كاسپي قۇبىر كونسورتسيۋمى جۇيەسىنە جەتكىزىلەتىن مۇناي كولەمى دە ءوندىرىستىڭ تومەندەۋىنە سايكەس قىسقارعان. دەرەككوزدەردىڭ مالىمەتىنشە، قازىرگى ۋاقىتتا كەن ورنىنداعى ءوندىرىس بىرتىندەپ قالپىنا كەلتىرىلىپ جاتىر.
كەن ورنىن يگەرۋشى «تەڭىزشەۆرويل» كومپانياسىنىڭ 50 پايىز ۇلەسىنە يەلىك ەتەتىن امەريكالىق Chevron كومپانياسى تەڭىز كەن ورنىندا «ەلەۋسىز وپەراتسيالىق اقاۋ» بولعانىن مالىمدەدى.
«كومپانيا ءۇشىن باسىمدىق – قاۋىپسىز ءارى سەنىمدى جۇمىستى قامتاماسىز ەتۋ. «تەڭىزشەۆرويل» ءوز قىزمەتى مەن كوممەرتسيالىق ماسەلەلەرىنە قاتىستى قوسىمشا اقپارات بەرمەيدى»، – دەلىنگەن كومپانيا تۇسىنىكتەمەسىندە.
ەنەرگەتيكا مينيسترلىگى دە تەڭىز كەن ورنىنداعى ءوندىرىستىڭ تومەندەۋىنە قاتىستى پىكىر ءبىلدىردى.
«2026 جىلدىڭ 28 مامىرىندا «تەڭىزشەۆرويل» كومپانياسىنىڭ وندىرىستىك نىساندارىنىڭ بىرىندە وپەراتسيالىق اقاۋ بولىپ، سونىڭ سالدارىنان مۇناي ءوندىرۋ كولەمى ۋاقىتشا تومەندەدى. قازىرگى ۋاقىتتا كومپانيا قاجەتتى جەدەل شارالاردى قابىلداپ جاتىر. كەن ورنىنداعى ءوندىرىس قالپىنا كەلتىرۋ كەزەڭىندە. قىزمەتكەرلەرگە، حالىققا جانە قورشاعان ورتاعا قاۋىپ تونگەن جوق»، – دەپ مالىمدەدى مينيسترلىك.
Reuters دەرەككوزدەرى ءوندىرىستى ءبىر اپتا ىشىندە كەزەڭ-كەزەڭىمەن قالپىنا كەلتىرۋ جوسپارلانعانىن ايتقان.
ايتا كەتەيىك، تەڭىز – قازاقستانداعى ەڭ ءىرى مۇناي كەن ورنى. جوبانىڭ وپەراتورى – «تەڭىزشەۆرويل» كومپانياسى. كومپانيا ۇلەستەرى Chevron, ExxonMobil, «قازمۇنايگاز» جانە «لۋكويل» كومپانيالارىنا تيەسىلى. تەڭىز جانە كورولەۆ كەن ورىندارىنىڭ وندىرىلەتىن مۇناي قورى 1,4 ملرد توننانى نەمەسە 11,5 ملرد باررەلدى قۇرايدى. جالپى بارلانعان قور كولەمى بويىنشا تەڭىز كەن ورنىندا 3,1 ملرد توننا نەمەسە 25 ملرد باررەل، ال كورولەۆ كەن ورنىندا 200 ملن توننا نەمەسە 1,6 ملرد باررەل مۇناي بار.
