بالالاردى قورعاۋ كۇنىنە وراي «وركەن» بالالاردىڭ ءال-اۋقاتىن ارتتىرۋ ۇلتتىق عىلىمي-پراكتيكالىق ينستيتۋتى «LIFE TIME M» قب-مەن بىرلەسىپ بالالار شىعارماشىلىق فەستيۆالىن ۇيىمداستىردى.
شارا بالالاردىڭ شىعارماشىلىق دامۋىن قولداۋعا، وسكەلەڭ ۇرپاق وكىلدەرىنىڭ ءوزىن-ءوزى جۇزەگە اسىرۋ ءۇشىن قولايلى، جايلى جانە مەيىرىمدى ورتا قالىپتاستىرۋعا باعىتتالعان.
فەستيۆالدىڭ نەگىزگى ماقساتى – ونەر، شىعارماشىلىق جانە بىرلەسكەن بەلسەندىلىك ارقىلى بالالاردىڭ ءوزىن-ءوزى كورسەتۋىنە جاعداي جاساۋ، سونداي-اق جاعىمدى ەموتسيونالدى اتموسفەرا قالىپتاستىرۋ.
فەستيۆال اياسىندا بالالاردىڭ قاتىسۋىمەن مازمۇندى كونتسەرتتىك باعدارلاما ۇيىمداستىرىلدى. جاس قاتىسۋشىلار وزدەرىنىڭ قابىلەتتەرىن، ارتىستىك شەبەرلىكتەرى مەن كرەاتيۆتىلىگىن پاش ەتە وتىرىپ، بي جانە مۋزىكالىق ونەرلەرىن ۇسىندى.
«بالالاردى قورعاۋ كۇنى – بۇل جاي عانا كۇنتىزبەدەگى مەرەكەلىك كۇن ەمەس. بۇل بىزگە، ەرەسەكتەرگە، ءوزىمىزدىڭ باستى جاۋاپكەرشىلىگىمىز تۋرالى ماڭىزدى ەسكەرتۋ. بالالار – ەلىمىزدىڭ بولاشاعى، ال ونىڭ قانداي بولاتىنى ولاردىڭ بۇگىنگى تاڭدا الاتىن قاۋىپسىزدىگى مەن قولداۋىنا بايلانىستى.
ءدال سوندىقتان ءبىزدىڭ ينستيتۋت اۋقىمدى «دوسبولLike» فلەشموبىن وتكىزۋدە! بۇل فلەشموب قازاقستاندىق مەكتەپتەرگە ەنگىزىلىپ ۇلگەرگەن «دوسبولLike» انتيبۋللينگتىك باعدارلاماسى اياسىندا وتۋدە. ءبىزدىڭ ماقساتىمىز – ءاربىر بالاعا دوستىق، قولداۋ جانە ءوزارا قۇرمەت حەيت پەن اگرەسسيانىڭ كەز كەلگەن كورىنىسىنەن كۇشتىرەك ەكەنىن كورسەتۋ. ءبىز ءاربىر وقۋشى سەنىمدى دامىپ، بولاشاققا نىق قادام باسا الاتىن قاۋىپسىز ورتا قۇرامىز!»، – دەپ اتاپ ءوتتى «وركەن» بااۇعپي» اقپاراتتىق تەحنولوگيالار دەپارتامەنتىنىڭ ديرەكتورى ارزۋ ساليكوۆا.
سونداي-اق بالالار ءۇشىن ءتۇرلى شىعارماشىلىق جانە زياتكەرلىك بايقاۋلار، ويىن جانە ينتەراكتيۆتى الاڭدار، ۆيكتورينالار مەن ويىن-ساۋىق بەلسەندىلىكتەرى ۇيىمداستىرىلدى. جەڭىمپازدار مەن بەلسەندى قاتىسۋشىلارعا ەستەلىك ءارى جۇلدەلى سىيلىقتار، بالالار كىتاپتارى مەن كادەسىيلار تابىس ەتىلدى.
فەستيۆال جىلى، مەرەكەلىك جانە مەيىرىمدى جاعدايدا ءوتىپ، بالالارعا جارقىن اسەرلەر، جاعىمدى ەموتسيالار جانە ءوز قابىلەتتەرى مەن تالانتتارىن اشۋعا مۇمكىندىك سىيلادى.
