ەلوردادا قازاقستان رەسپۋبليكاسىنىڭ جاستار اراسىنداعى پاراۆەلوسپورت چەمپيوناتى مەن ۆەلوسپورتتان قازاقستان رەسپۋبليكاسى گيمنازياداسىنىڭ جابىلۋ جانە جەڭىمپازداردى ماراپاتتاۋ ءراسىمى ءوتتى. بۇل دودا ەلىمىزدىڭ تۇكپىر-تۇكپىرىنەن كەلگەن جاس سپورتشىلاردىڭ باسىن قوسىپ، ولاردىڭ سپورتتاعى الەۋەتىن كورسەتۋگە مۇمكىندىك بەردى.
بىرنەشە كۇنگە سوزىلعان جارىس بارىسىندا قاتىسۋشىلار وزدەرىنىڭ توزىمدىلىگى مەن شەبەرلىگىن عانا ەمەس، جەڭىسكە دەگەن جىگەرى مەن قايسارلىعىن دا دالەلدەي ءبىلدى. ال جابىلۋ سالتاناتى سپورتشىلار، جاتتىقتىرۋشىلار جانە اتا-انالار ءۇشىن ەرەكشە اسەرلى ساتتەرگە تولى بولدى.
جارىستىڭ جابىلۋ راسىمىندە ۇيىمداستىرۋشىسى ءماجىلىس دەپۋتاتى سەيتجان كەنجەعۇل قاتىسۋشىلاردى ماراپاتتاپ، جەڭىمپازدارعا ارنايى سىيلىقتار مەن مەدالدار تابىستادى. سونىمەن قاتار، شاراعا قوناق رەتىندە ءماجىلىس دەپۋتاتتارى يسلام ەركىنۇلى مەن ەكاتەرينا سەرگەەۆنا، قازاقستان رەسپۋبليكاسى تۋريزم جانە سپورت مينيسترلىگى سپورت كوميتەتىنە قاراستى مۇمكىندىگى شەكتەۋلى ازاماتتارعا ارنالعان سپورتتىق دايارلاۋ ورتالىعىنىڭ ديرەكتورى بولاتبەك اسىلبەكوۆ، سپورت ورتالىعىنىڭ ديرەكتورى تاشنەتوۆ ارمان جانە «سامۇرىق» قولداۋ قورىنىڭ ديرەكتورى ءالفيا داۋلەتقاليقىزى قاتىسىپ، ۇزدىك سپورتشىلاردى ماراپاتتاۋ راسىمىنە اتسالىستى.
ماراپاتتاۋ ساتىندە اتا-انالاردىڭ قۋانىشى ەرەكشە بايقالدى. ولار بالالارىنىڭ جەتىستىكتەرىنە ماقتانىپ، ءار جەڭىستى بىرگە ءبولىستى. بۇل تەك سپورتتىق ناتيجە عانا ەمەس، ۇلكەن ەڭبەك پەن قولداۋدىڭ جەمىسى ەكەنى انىق سەزىلدى.
قازاقستان پاراۆەلوسپورتىنىڭ باس باپكەرى نيكولاي ۆاسيلەۆيچ جاس سپورتشىلارعا ارناعان سوزىندە جاستارعا ەرەكشە سەنىم ارتاتىنىن جەتكىزدى.
– مەن بارشاڭىزعا، اسىرەسە جاستارعا ساتتىلىك تىلەيمىن. ءبىز بارلىق سپورتشىلاردى باقىلاپ وتىرامىز، ەشكىم نازاردان تىس قالمايدى. ارقايسىسىنا كوڭىل بولىنەدى، ءار سپورتشى ءوز مۇمكىندىگىن كورسەتۋگە مۇمكىندىك الادى. ال ۇزدىكتەر ۇلتتىق قۇراما ساپىنا ءوتىپ، جالاقى مەن سىياقى الىپ، كاسىبي دەڭگەيدە دامۋعا جول اشادى. ەڭ باستىسى – ەڭبەك ەتۋ، جاتتىعۋدى توقتاتپاۋ، – دەدى ول.
بۇگىندە پاراۆەلوسپورت تەك جارىس الاڭى عانا ەمەس، كوپتەگەن جاس ءۇشىن جاڭا مۇمكىندىككە اينالىپ وتىر. وسىنداي چەمپيوناتتار ارقىلى جاستار ءوز كۇشىنە سەنۋدى ۇيرەنىپ، ۇلكەن سپورتقا جولداما الادى. ەڭ ماڭىزدىسى — بۇل جارىستار ينكليۋزيۆتى قوعام قالىپتاستىرۋعا جانە ەرەكشە سپورتشىلارعا جاڭا بەلەستەردى باعىندىرۋعا مۇمكىندىك بەرەدى.
بۇل چەمپيونات تاعى ءبىر ماڭىزدى دۇنيەنى كورسەتتى: سپورت تەك مەدال ءۇشىن ەمەس، مۇمكىندىكتەردى كەڭەيتۋ، سەنىم قالىپتاستىرۋ جانە ءار سپورتشىعا ءوز الەۋەتىن كورسەتۋ ءۇشىن قاجەت. جاس سپورتشىلاردىڭ بۇگىنگى تالپىنىسى — ەرتەڭگى ۇلكەن جەڭىستەردىڭ باستاۋى.
