اقمولا وبلىسىندا 17 جاستاعى ستۋدەنت كەنە شاققاننان كەيىن اۋىر حالدە رەانيماتسيا بولىمىنە ءتۇستى. قازىرگى ۋاقىتتا ول وبلىستىق بالالار اۋرۋحاناسىندا جاتىر، دەپ حابارلايدى "ادىرنا".
الدىن الا دياگنوز – كەنە ارقىلى تارالاتىن ۆيرۋستىق ەنتسەفاليت.
بەلگىلى بولعانداي، ءجاسوسپىرىمدى كەنە 16 مامىر كۇنى شاققان. الايدا وتباسى مەديتسينالىق كومەككە بىردەن جۇگىنبەگەن جانە بۇل جاعدايدى ەشكىمگە حابار بەرمەگەن. ۋاقىت وتە كەلە ناۋقاستىڭ جاعدايى كۇرت ناشارلاعان.
اقمولا وبلىستىق دەنساۋلىق ساقتاۋ باسقارماسىنىڭ مالىمەتىنشە، ءجاسوسپىرىمنىڭ ساناسى بۇزىلعان. دارىگەرلەر قاجەتتى تەكسەرۋلەر مەن ەم-شارالاردى جۇرگىزىپ جاتىر.
مەديتسينا ماماندارى كەنە شاققاننان كەيىن بەلگىلەر بىردەن بىلىنبەۋى مۇمكىن ەكەنىن ەسكەرتەدى. كەي جاعدايدا ادام ءوزىن ءبىر اپتا نەمەسە ودان دا ۇزاق ۋاقىت بويى قالىپتى سەزىنۋى مۇمكىن.
ادەتتە العاشقى بەلگىلەر 7–10 كۇن ىشىندە پايدا بولادى. كەنە ەنتسەفاليتىنىڭ اسقىنۋى وتە قاۋىپتى، سەبەبى ۆيرۋس ورتالىق جۇيكە جۇيەسىن مي مەن جۇلىندى زاقىمدايدى. ونىڭ سالدارى قايتىمسىز بولۋى مۇمكىن، – دەدى وبلىستىق بالالار اۋرۋحاناسىنىڭ رەانيماتسيا ءبولىمىنىڭ مەڭگەرۋشىسى ەربول جۇماعاليەۆ.
ايتا كەتسەك، ماۋسىم باسىنان بەرى اقمولا وبلىسىندا كەنە شاققاننان كەيىن شامامەن 500 ادام مەديتسينالىق كومەككە جۇگىنگەن. ولاردىڭ ۇشەۋىندە كەنە ەنتسەفاليتى راستالعان. ولار بۋراباي جانە ساندىقتاۋ اۋداندارىنىڭ تۇرعىندارى.
