ماڭعىستاۋ وبلىسىنداعى جاڭاوزەن-كەندىرلى تاسجولىندا جول-كولىك اپاتىنان 10 ادام قازا تاپتى. ونىڭ بەسەۋى كامەلەتكە تولماعان. وسى وقيعاعا بايلانىستى ماڭعىستاۋ وبلىسى پوليتسيا دەپارتامەنتىنىڭ باستىعى ءوڭىر تۇرعىندارىنا ۇندەۋ جاسادى، دەپ حابارلايدى “ادىرنا” ۇلتتىق پورتالى.
وقيعا 16 ماۋسىم كۇنى ساعات 21:30 شاماسىندا بولعان.
"قازا بولعانداردىڭ تۋىستارى مەن جاقىندارىنا كوڭىل ايتا وتىرىپ، ەسكەرتكىم كەلەدى. جول-كولىك وقيعاسىنىڭ نەگىزگى سەبەبى – كولىكتىڭ قارسى باعىتقا شىعىپ كەتۋى. كەشەگى قورقىنىشتى اپاتتى تالداي وتىرىپ، «Toyota» كولىگىنىڭ ىشىندە 8 ادام بولعانىن اتاپ وتكىم كەلەدى. ەگەر ەرەجەلەر ساقتالىپ، جۇرگىزۋشى مەن جولاۋشىلار قاۋىپسىزدىك بەلدىگىن تاعىپ، سونداي-اق بالالارعا ارنالعان ورىندىقتار پايدالانىلسا، وندا كولىككە تەك 4 ادام عانا سىيادى. ال، اپات بولعان جاعدايدا بۇل قۇرالدار ادام ءومىرى مەن دەنساۋلىعىن ساقتاپ قالۋى مۇمكىن. وسى جول-كولىك وقيعاسىنداعى ەكىنشى كولىك – «Duster» اۆتوكولىگىنىڭ جۇرگىزۋشىسى ءبىر اي بۇرىن قاۋىپسىزدىك بەلدىگىن تاقپاعانى ءۇشىن ەسكەرتۋ الىپ، ايىپپۇل سالىنعان. وسىعان بايلانىستى جول قوزعالىسى ەرەجەلەرىن ساقتاۋدى جانە ءوز ومىرلەرىڭىز بەن بالالارىڭىزدىڭ ومىرىنە جاۋاپكەرشىلىكپەن قاراۋلارىڭىزدى سۇرايمىن!"- دەپ ۇندەۋ جاسادى ايماق تۇرعىندارى مەن قوناقتارىنا پوليتسيا گەنەرال-مايورى ايان دۇيسەمباەۆ.