قاراعاندىدا 13 جاستاعى نۇرالى ءالحان سۋعا باتىپ بارا جاتقان 4 جاستاعى بالانى قۇتقارىپ قالدى، دەپ حابارلايدى “ادىرنا” ۇلتتىق پورتالى.
وقيعا تامىز ايىنىڭ باسىندا بۇقار جىراۋ اۋدانىنداعى سەمىزبۇعا كولىندە بولعان. 4 جاستاعى بالا ۇرلەمەلى ماتراسپەن سۋدا ءجۇزىپ جۇرگەن. ءبىر ساتتە قاتتى جەل سوعىپ، ماتراس اۋدارىلىپ كەتكەن. سونىڭ سالدارىنان بالا سۋعا ءتۇسىپ كەتكەن.
سول ماڭدا بولعان 9-سىنىپ وقۋشىسى نۇرالى ءالحان كومەككە ۇمتىلعان. ءجاسوسپىرىم بالانى سۋدان الىپ شىققان.
نۇرالىنىڭ ەرلىگى الەۋمەتتىك جەلىدە تاراعاننان كەيىن قاراعاندى وبلىسى پوليتسيا دەپارتامەنتىنىڭ باستىعى نەگمەت يسماعۇلوۆ ونى اناسى سامال ابدراحمانوۆامەن بىرگە كەزدەسۋگە شاقىردى.
پوليتسيا دەپارتامەنتىنىڭ باسشىسى ءجاسوسپىرىمنىڭ قيىن ساتتە باتىلدىق تانىتىپ، ءوز ءومىرىن قاتەرگە تىگە وتىرىپ بالانى قۇتقارعانىن اتاپ ءوتتى. ول نۇرالىنىڭ اتا-اناسىنا وسىنداي باتىل ءارى جاناشىر ۇل تاربيەلەگەنى ءۇشىن العىس ءبىلدىردى.
كەزدەسۋ بارىسىندا نەگمەت يسماعۇلوۆ نۇرالىنىڭ اناسىنا العىس حات تابىستادى.
