بۇگىن حالىقارالىق بالالاردى قورعاۋ كۇنىندە وبلىس اكىمى مۇرات ەرگەشباەۆ، قر پارلامەنتى سەناتى مەن ءماجىلىسىنىڭ دەپۋتاتتارى رۋسلان رۇستەموۆ، مارحابات جايىمبەتوۆ، زيالى قاۋىم وكىلدەرى مەن ەل اعالارى مەملەكەت باسشىسىنىڭ قولداۋىمەن سالىنعان بوتانيكالىق باقتىڭ اشىلۋ راسىمىنە قاتىستى.
مەرەكە كۇنى جەتكىنشەكتەرگە تارتۋ ەتىلگەن بوتانيكالىق باق پرەزيدەنت ساياباعى اۋماعىندا ورنالاسقان. باس مەردىگەر - «Alem Qurylys AQ» جشس. قۇرىلىسىنا 4,9 ملرد تەڭگە بولىنگەن، نىساننىڭ ىرگەتاسى بىلتىر قىركۇيەك ايىندا سول كەزدەگى ايماق باسشىسى نۇرلىبەك نالىباەۆتىڭ باستاماسىمەن قالانعان بولاتىن.
اشىلۋ راسىمىندە وبلىس اكىمى مۇرات نالقوجاۇلى بالالاردى مەرەكەمەن قۇتتىقتاپ، بوتانيكالىق باق جۇمىسى جەتكىنشەكتەردىڭ ءتيىمدى دەمالىسىن ۇيىمداستىرۋعا جانە تىڭ جوبالاردى جۇزەگە اسىرۋعا باعىتتالعانىن اتاپ ءوتتى.
«بارشاڭىزدى 1 ماۋسىم – حالىقارالىق بالالاردى قورعاۋ كۇنى مەرەكەسىمەن شىن جۇرەكتەن قۇتتىقتايمىن! بالا – ءبىزدىڭ باستى بايلىعىمىز. ءبىلىمدى، دەنى ساۋ، ۇلتجاندى ۇرپاق تاربيەلەۋ – بارشامىزدىڭ ورتاق پارىزىمىز.
پرەزيدەنتىمىز قاسىم-جومارت كەمەلۇلى: «ۇل-قىزدارىمىزدىڭ پاراساتتى، جان-جاقتى بولىپ وسۋىنە جاعداي جاساۋ، جاس ازاماتتارىمىزدىڭ قۇقىعىن قورعاپ، دەنساۋلىعىن ساقتاۋ – مەملەكەتىمىزدىڭ باستى مىندەتى»، – دەگەن بولاتىن.
بۇگىن پرەزيدەنت ساياباعىنىڭ اۋماعىنان اشىلعان بوتانيكالىق باق – وسى اۋقىمدى باستامانىڭ ايماعىمىزداعى ناقتى ءارى جەمىستى كورىنىسى. باق ىشىنە قىتاي، وڭتۇستىك افريكا، جاپونيا، وڭتۇستىك جانە ورتالىق امەريكادا وسەتىن جاسىل جەلەك ەگىلدى. وسى ارقىلى جاس جەتكىنشەكتەرگە وسىمدىكتەردىڭ ەكوجۇيەدەگى ماڭىزى تۇسىندىرىلەدى. بۇل جاي عانا بالالار سەرۋەندەيتىن ساياباق ەمەس، تابيعات پەن عىلىمدى ۇشتاستىراتىن، ەكولوگيالىق مادەنيەتتى قالىپتاستىراتىن كوپفۋنكتسيونالدى كەشەن بولماق. بالالارىمىز وسى جەردە تابيعاتپەن تىلدەسىپ، ەكو-جاۋاپكەرشىلىكتىڭ، ەڭبەكقورلىقتىڭ شىنايى ۇلگىسىن كورەدى. وسى باقتان ءبىزدىڭ ايماقتىڭ عانا ەمەس، بۇكىل ەلىمىزدىڭ ەكولوگياسىن زەرتتەيتىن بولاشاق عالىمدار، بيولوگتار مەن اگرونومدار شىعادى دەپ سەنەمىز»، – دەدى مۇرات نالقوجاۇلى.
راسىمدە رۋسلان رۇستەموۆ، مارحابات جايىمبەتوۆ قۇتتىقتاۋ ءسوز سويلەدى. ءبىلىم بەرۋ سالاسىنىڭ دامۋىنا ەلەۋلى ۇلەس قوسقان ۇستازدار مەن جاڭا نىسان قۇرىلىسىن مەرزىمىندە اياقتاعان مەردىگەر مەكەمە قىزمەتكەرلەرى وبلىس اكىمىنىڭ العىس حاتىمەن ماراپاتتالدى.
بوتانيكالىق باق – ەكولوگيالىق تانىمدى، ءتۋريزمدى دامىتۋعا جانە جاڭا قوعامدىق كەڭىستىكتەر قۇرۋعا باعىتتالعان زاماناۋي كوپفۋنكتسيونالدى كەشەن. جالپى اۋدانى 1500 شارشى مەتر بولاتىن ەكى جىلىجايعا افريكا، وڭتۇستىك امەريكا، اۆستراليا، جاپونيا، قىتاي جانە ماداگاسكار سياقتى الەمنىڭ ءار ايماعىنان 92 ءتۇرلى 3300-دەن استام وسىمدىك ەگىلگەن. ۆەەرلى پالما، كانار قۇرماسى، كاكتۋس پەن الوە، ۆاشينگتونيا پالماسى، سترەليتسيا، جاكاراندا، الىپ يۋككا، ماقتا اعاشى، بامبۋك، ساندىك وسىمدىكتەر، كاريوتا جايقالىپ تۇر. بۇل وسىمدىكتەر گۇلدەگەندە حوش ءيىسى اڭقىپ، قىزعىلت سارى، كوگىلدىر، كۇلگىن سياقتى الۋان تۇسكە بويالادى.
وسىمدىكتەرگە قولايلى جاعداي جاساۋ ءۇشىن ميكروكليماتتى اۆتوماتتى باسقارۋ، سۋارۋ جانە سۋ دايىنداۋدىڭ زاماناۋي ينجەنەرلىك جۇيەلەرىمەن جابدىقتالعان.
بوتانيكالىق باق وسىمدىكتەردىڭ بىرەگەي تۇرلەرى وسەتىن ورىن عانا ەمەس، ەكولوگيالىق مادەنيەتتىڭ، ءبىلىم بەرۋدىڭ جانە ىشكى ءتۋريزمنىڭ دامۋىنا قىزمەت ەتەتىن، ايماق تۇرعىندارى مەن قوناقتارى ءجيى باس قوساتىن مەكەنگە اينالادى.
مۇندا ستۋدەنتتەر، مەكتەپ وقۋشىلارىنىڭ، تابيعات جاناشىرلارىنىڭ تانىمىن كەڭەيتۋگە بارلىق جاعداي جاسالعان. بوتانيكالىق باقتىڭ ەرەكشە اتموسفەراسى كەلۋشىلەرگە جايلىلىق سىيلايدى.
ايتا كەتەيىك، مەملەكەت باسشىسىنىڭ قولداۋىمەن سىر وڭىرىندە كەيىنگى ءتورت جىلدا 46 زاماناۋي ءبىلىم بەرۋ نىسانى تابىستالدى.
«كەلەشەك مەكتەپتەرى» ۇلتتىق جوباسى اياسىندا 10 جاڭا مەكتەپ سالىندى. فيزيكا-ماتەماتيكا باعىتىنداعى ء«بىلىم-يننوۆاتسيا» ليتسەي-ينتەرناتى، مۋزىكالىق كوللەدجدىڭ جاڭا وقۋ عيماراتى مەن جاتاقحاناسى پايدالانۋعا بەرىلدى. «وقۋشىلار سارايى»، «سىر جۇلدىزدارى» اكادەمياسى، جالاعاش، جاڭاقورعان، شيەلى اۋداندارىنداعى «وقۋشىلار ءۇيى» مەن «ونەر مەكتەپتەرى» جاس جەتكىنشەكتەردىڭ شىعارماشىلىق، زياتكەرلىك الەۋەتىن ارتتىرۋعا قىزمەت ەتۋدە. جاقىندا عانا جىل بويى ۇزدىكسىز قىزمەت كورسەتەتىن «AI-KERIM» وقۋ-ساۋىقتىرۋ ورتالىعى بالالار يگىلىگىنە اينالدى.
