جامبىل وبلىسىنىڭ قورداي اۋدانىندا ادام ولىمىنە اكەلگەن جول-كولىك وقيعاسى بويىنشا قىلمىستىق ءىس قوزعالدى، دەپ حابارلايدى "ادىرنا" ۇلتتىق پورالى.
بۇل تۋرالى وبلىستىق پوليتسيا دەپارتامەنتى مالىمدەدى.
ۆەدومستۆونىڭ مالىمەتىنشە، جول اپاتى 1 ماۋسىم كۇنى ساعات 15:00 شاماسىندا رەسپۋبليكالىق ماڭىزى بار تاسجولدا بولعان. الدىن الا دەرەكتەر بويىنشا، Lexus اۆتوكولىگىنىڭ جۇرگىزۋشىسى جول قورشاۋىنا جاناي سوعىلىپ، سوققىدان كەيىن كولىك اينالىپ كەتىپ، جولدىڭ ءجۇرىس بولىگىندە توقتاپ قالعان. ارادا ءبىراز ۋاقىت وتكەن سوڭ توقتاپ تۇرعان Lexus كولىگىنە Tank 500 ماركالى اۆتوكولىك سوعىلعان. پوليتسيانىڭ حابارلاۋىنشا، Tank 500 جۇرگىزۋشىسى دەر كەزىندە تەجەگىشتى باسقانىمەن، سوقتىعىستىڭ الدىن الا الماعان.
جول-كولىك وقيعاسى سالدارىنان Tank 500 اۆتوكولىگىنىڭ جۇرگىزۋشىسى وقيعا ورنىندا كوز جۇمدى. اتالعان دەرەك بويىنشا قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر. قۇقىق قورعاۋ ورگاندارى وقيعانىڭ بارلىق ءمان-جايى مەن سەبەپتەرىن انىقتاۋدا.
