اقتوبە قالالىق سوتى 35 جاستاعى ازات قونىسقا قاتىستى ۇكىم شىعاردى، دەپ حابارلايدى "ادىرنا" ۇلتتىق پورتالى.
ول قىلمىستىق كودەكستىڭ 174-بابى 1-بولىگى («الەۋمەتتىك، ۇلتتىق، رۋلىق، ناسىلدىك، تەكتىك نەمەسە ءدىني الاۋىزدىقتى قوزدىرۋ») بويىنشا كىنالى دەپ تانىلىپ، 3 جىل 6 ايعا باس بوستاندىعىنان ايىرىلدى.
سوت ماتەريالدارىنا سايكەس، ايىپتالۋشى الەۋمەتتىك جەلىدەگى تىكەلەي ەفير بارىسىندا قازاق حالقىنىڭ ۇلتتىق قۇندىلىعى سانالاتىن دومبىراعا قاتىستى ونى «حارام» دەپ اتاپ، قورلايتىن پىكىر بىلدىرگەن. سونداي-اق ول قازاقستان مۇسىلماندارى ءدىني باسقارماسى وكىلدەرىنە ءتىل تيگىزگەن. ساراپتاما قورىتىندىسى ونىڭ سوزدەرىندە ۇلتتىق جانە ءدىني الاۋىزدىقتى قوزدىرۋ بەلگىلەرى بار ەكەنىن انىقتاعان.
سوت وتىرىسىندا ازات قونىس كىناسىن تولىق مويىنداپ، جاساعان ارەكەتىنە وكىنەتىنىن ايتىپ، قازاق حالقىنان كەشىرىم سۇرادى. الايدا سوت ونىڭ ارەكەتىن قوعامعا قاۋىپتى قۇقىقبۇزۋشىلىق دەپ باعالاپ، مەملەكەتتىك ايىپتاۋشى سۇراعان جازا مەرزىمىن بەكىتتى.
ەسكە سالايىق، بۇل وقيعا الەۋمەتتىك جەلىلەردە تاراعان ۆيدەودان كەيىن بەلگىلى بولعان. كەيىن قۇقىق قورعاۋ ورگاندارى كۇدىكتىنى انىقتاپ، ونى قاماۋعا العان ەدى.
ماماندار مۇنداي ىستەر قوعامداعى ءدىني جانە ۇلتتىق كەلىسىمدى ساقتاۋدىڭ ماڭىزىن كورسەتەتىنىن اتاپ وتەدى. قازاقستان زاڭناماسىنا سايكەس، الاۋىزدىقتى قوزدىرۋعا باعىتتالعان كەز كەلگەن ارەكەت قىلمىستىق جاۋاپكەرشىلىككە اكەلەدى.
