Aqtöbe qalalyq soty 35 jastaǧy Azat Qonysqa qatysty ükım şyǧardy, dep habarlaidy "Adyrna" ūlttyq portaly.
Ol Qylmystyq kodekstıŋ 174-baby 1-bölıgı («Äleumettık, ūlttyq, rulyq, näsıldık, tektık nemese dıni alauyzdyqty qozdyru») boiynşa kınälı dep tanylyp, 3 jyl 6 aiǧa bas bostandyǧynan aiyryldy.
Sot materialdaryna säikes, aiyptaluşy äleumettık jelıdegı tıkelei efir barysynda qazaq halqynyŋ ūlttyq qūndylyǧy sanalatyn dombyraǧa qatysty ony «haram» dep atap, qorlaityn pıkır bıldırgen. Sondai-aq ol Qazaqstan mūsylmandary dıni basqarmasy ökılderıne tıl tigızgen. Saraptama qorytyndysy onyŋ sözderınde ūlttyq jäne dıni alauyzdyqty qozdyru belgılerı bar ekenın anyqtaǧan.
Sot otyrysynda Azat Qonys kınäsın tolyq moiyndap, jasaǧan äreketıne ökınetının aityp, qazaq halqynan keşırım sūrady. Alaida sot onyŋ äreketın qoǧamǧa qauıptı qūqyqbūzuşylyq dep baǧalap, memlekettık aiyptauşy sūraǧan jaza merzımın bekıttı.
Eske salaiyq, būl oqiǧa äleumettık jelılerde taraǧan videodan keiın belgılı bolǧan. Keiın qūqyq qorǧau organdary küdıktını anyqtap, ony qamauǧa alǧan edı.
Mamandar mūndai ıster qoǧamdaǧy dıni jäne ūlttyq kelısımdı saqtaudyŋ maŋyzyn körsetetının atap ötedı. Qazaqstan zaŋnamasyna säikes, alauyzdyqty qozdyruǧa baǧyttalǧan kez kelgen äreket qylmystyq jauapkerşılıkke äkeledı.
