بۇگىن اتىراۋ وبلىسى بويىنشا ەكولوگيا دەپارتامەنتىندە 5 ماۋسىم – دۇنيەجۇزىلىك قورشاعان ورتانى قورعاۋ كۇنى جانە ەكولوگتار كۇنىنە وراي «ەكولوگ ساعاتى» اتتى تانىمدىق-تاجىريبەلىك شارا ءوتتى.
ءىس-شاراعا ءوڭىردىڭ ەكوبەلسەندىلەرى، تاۋەلسىز ەكولوگتارى، جاس ماماندار مەن ستۋدەنتتەر قاتىسىپ، قورشاعان ورتانى قورعاۋ سالاسىنداعى وزەكتى ماسەلەلەر مەن ولاردى شەشۋدىڭ ءتيىمدى جولدارىن تالقىلادى.
جيىن بارىسىندا وڭىرگە بەلگىلى ەكولوگيالىق جوبا اۆتورلارى مەن تاۋەلسىز ەكولوگتار كۇلاش اماندىقوۆا، سۇلتان احمەت، دميتري ۋرگاچەۆ جانە جانسايا ناكىمجانوۆا ءسوز سويلەپ، ءوز تاجىريبەلەرىمەن ءبولىستى.
بايانداماشىلار قالدىقتاردى بولەك جيناۋ جانە سۇرىپتاۋ مادەنيەتىن قالىپتاستىرۋ، ەرىكتىلەر قوزعالىسىن دامىتۋ، ەكولوگيالىق جوبالاردى ازىرلەۋ مەن جۇزەگە اسىرۋ، تابيعاتقا جاناشىرلىق تانىتۋ، سونداي-اق كۇندەلىكتى ومىردەگى قاراپايىم ەكولوگيالىق ادەتتەردىڭ ماڭىزى تۋرالى مازمۇندى باياندامالار جاسادى.
قاتىسۋشىلار قورشاعان ورتانى قورعاۋ باعىتىنداعى تابىستى جوبالارمەن تانىسىپ، ەكولوگيالىق باستامالاردى جۇزەگە اسىرۋداعى تاجىريبەلەر مەن تىڭ يدەيالار جونىندە پىكىر الماستى. سونىمەن قاتار، تابيعاتتى ساقتاۋ ءاربىر ازاماتتىڭ جاۋاپكەرشىلىگى ەكەنى جانە ۇلكەن وزگەرىستەردىڭ شاعىن قادامداردان باستالاتىنى ەرەكشە اتاپ ءوتىلدى.
ەكولوگيا ساعاتىنىڭ باستى ماقساتى – جاس سالا ماماندارى مەن ستۋدەنتتەرگە ەكوبەلسەندىلەر مەن تاۋەلسىز ەكولوگتاردىڭ تاجىريبەسىن ناسيحاتتاۋ، ولاردىڭ ەكولوگيالىق مادەنيەتىن ارتتىرۋ، قورشاعان ورتانى قورعاۋ باعىتىنداعى باستامالارعا قىزىعۋشىلىعىن وياتۋ جانە تابيعاتقا دەگەن جاۋاپكەرشىلىك كوزقاراسىن قالىپتاستىرۋ.
«ەكولوگ ساعاتى» قاتىسۋشىلار ءۇشىن پايدالى اقپارات پەن جاڭا يدەيالار الاڭىنا اينالىپ، قورشاعان ورتانى قورعاۋ ىسىندەگى ءوزارا ىنتىماقتاستىقتى نىعايتۋعا مۇمكىندىك بەردى.
