بيىل اتىراۋدا ناۋرىز Digital Nauryz فورماتىندا تويلانۋدا. ۇلتتىق ءداستۇر مەن زاماناۋي تەحنولوگيالاردى توعىستىرعان مەرەكە تسيفرلاندىرۋ جىلىنا قويىلعان ماقسات-مۇددەلەردى دە بىرىكتىرىپ وتىر. يساتاي مەن ماحامبەت اتىنداعى الاڭدا ءۇش تاقىرىپتا كيىز ءۇي تىگىلىپ، قوناقتار بىرەگەي تسيفرلىق تاجىريبەلەرمەن تانىستى.
مىسالى، مەرەكەگە كەلگەندەر ارنايى تسيفرلىق كيىز ۇيدە ورناتىلعان جاساندى ينتەللەكت كومەگىمەن اتا-بابالاردىڭ اق باتاسىن الىپ، ءبىر ساتكە ولاردىڭ اسقاق رۋحى مەن ايبىنىن سەزىنە الدى.
كەلەسى كيىز ۇيدە قوناقتار قازاقتىڭ ۇلتتىق كيىمدەرىن ۆيرتۋالدى تۇردە كيىپ كورۋگە مۇمكىندىك الدى. ال ءۇشىنشى كيىز ۇيدە ەلىمىزدىڭ مادەنيەتى، داستۇرلەرى مەن جەتىستىكتەرى جونىندە بەينەروليكتەر كورسەتىلدى.
بۇعان قوسا، الاڭدا التى ينتەراكتيۆتى پانەل ورناتىلىپ، جۇرتشىلىق تسيفرلىق جوبالار مەن يننوۆاتسيالىق شەشىمدەر جونىندە اقپارات الدى. سونداي-اق كورەرمەندەر “الاقان” جوباسىمەن تانىسىپ، “روبوتتار شايقاسى” شوۋىن تاماشالادى.
ءىس-شارانىڭ تاعى ءبىر ەرەكشەلىگى – جاساندى ينتەللەكت تەحنولوگيالارى ارقىلى جاسالعان ۆيرتۋالدى جۇرگىزۋشىلەر بولدى.
