مەملەكەت باسشىسى قاسىم-جومارت توقاەۆتىڭ «تازا قازاقستان» جالپىۇلتتىق باستاماسى اياسىندا تۇركىستان وبلىسىندا ەكولوگيالىق اكتسيا ۇيىمداستىرىلدى. اتالعان شارا تۇلكىباس اۋدانىنداعى «اقسۋ-جاباعىلى» مەملەكەتتىك تابيعي قورىعىنىڭ 100 جىلدىعىنا وراي قورىق اۋماعىندا ءوتىپ، «Taza Qazaqstan» ەكولوگيالىق اكتسياسى اياسىندا قازاقستان رەسپۋبليكاسى پرەزيدەنتىمەن تەلەكوپىر بايلانىسى ورناتىلدى.
تابيعاتتى قورعاۋ جانە ەكولوگيالىق مادەنيەتتى ارتتىرۋ ماقساتىندا وتكەن اكتسياعا قاتىسۋشىلار ارنايى ورناتىلعان LED ەكران الدىنا جينالىپ، تەلەكوپىر ارقىلى مەملەكەت باسشىسىمەن تىكەلەي بايلانىسقا شىقتى. ونلاين كەزدەسۋ بارىسىندا تۇركىستان وبلىسىنىڭ اكىمى نۇرالحان كوشەروۆ جانە «اقسۋ-جاباعىلى مەملەكەتتىك تابيعي قورىعىنىڭ» ەكو-ۆولەنتەرى ايدا ورىنباسارقىزى ءسوز سويلەدى.
وبلىس اكىمى ءوڭىر تۇرعىندارى «Taza Qazaqstan» جالپىۇلتتىق باستاماسىن بەلسەندى قولداپ وتىرعانىن اتاپ ءوتتى.
– تۇركىستان وبلىسىنىڭ حالقى «Taza Qazaqstan» جالپىۇلتتىق باعدارلاماسىنىڭ جازعى ماۋسىمىن باستاۋعا دايىن. باعدارلاما باستالعالى وڭىردە 2 ميلليوننان استام اعاش ەگىلىپ، ەلدى مەكەندەردىڭ سانيتارلىق تازالىعى ءۇشىن 400-گە جۋىق جاڭا تەحنيكا ساتىپ الىنعان. سونىمەن قاتار 11 ساياباق، 8 سكۆەر جانە 4 اللەيا پايدالانۋعا بەرىلدى. ء«مولدىر بۇلاق» اكتسياسى اياسىندا 155 بۇلاق، 77 وزەن تازارتىلدى. بۇگىن وبلىستىڭ بارلىق اۋدان، قالاسىندا «Taza Qazaqstan» باعدارلاماسى اياسىندا اۋقىمدى ءىس-شارا وتكىزىلىپ، 20 مىڭ ءتۇپ اعاش ەگىلدى. ءىس-شاراعا 340 تەحنيكا جۇمىلدىرىلدى. ناتيجەسىندە 350 توننا قوقىس شىعارىلىپ، 17 مىڭ گەكتار جەر تازاردى. جالپى 2026 جىلى 1 ميلليوننان استام اعاش ەگۋ جوسپارلانىپ وتىر، – دەگەن وبلىس اكىمى بيىل ايگىلى «اقسۋ-جاباعىلى» قورىعىنا 100 جىل تولىپ وتىرعانىن ايتىپ، قورىق ۇجىمى جانۋارلار مەن وسىمدىكتەر الەمىن جاناشىرلىقپەن قورعاپ كەلە جاتقانىن جەتكىزدى.
تەلەكوپىر اياسىندا تۇركىستان وبلىسىمەن قاتار پاۆلودار وبلىسى، باتىس جانە شىعىس قازاقستان وبلىستارى تىكەلەي ەفيرگە قوسىلدى.
جالپى قورىق اۋماعىندا وتكەن شاراعا 2 مىڭنان اسا ادام قاتىسىپ، 1000 ءتۇپ كوشەت ەگىلدى.
ايتا كەتەيىك، 1926 جىلى قۇرىلعان «اقسۋ-جاباعىلى» قورىعى – ەلىمىزدەگى تۇڭعىش تابيعي قورىق. قورىق اۋماعى 131 مىڭ گەكتاردان اسادى جانە قىرعىزستان مەن وزبەكستان مەملەكەتتەرىمەن شەكارالاس ورنالاسقان.
قورىق فلوراسى مەن فاۋناسى ەرەكشە باي. مۇندا 1300-دەن استام وسىمدىك ءتۇرى، سونىڭ ىشىندە سيرەك كەزدەسەتىن قىزعالداقتار وسەدى. سونىمەن قاتار قار بارىسى، ارقار، تاۋتەكە، سىلەۋسىن، قوڭىر ايۋ سياقتى سيرەك جانۋارلار مەكەندەيدى. اقسۋ-جاباعىلى قورىعى تەك تابيعاتتى قورعاۋ ورنى عانا ەمەس، سونىمەن قاتار عىلىمي زەرتتەۋ جۇرگىزەتىن ماڭىزدى ايماق. ول يۋنەسكو-نىڭ بيوسفەرالىق رەزەرۆاتتار تىزىمىنە ەنگىزىلگەن.
