تۇركىستان وبلىسى تورتكۇل اۋىلىندا 16 جاستاعى قىزدى بىرنەشە ادام زورلاپ، اياۋسىز ءولتىرىپ كەتكەن. بۇل تۋرالى «نەمولچيKZ» قوعامدىق قورى جاريالادى، دەپ حابارلايدى “ادىرنا” ۇلتتىق پورتالى.
پوليتسيانىڭ رەسمي اقپاراتىنا قاراساق، ءبىر كۇدىكتى عانا ۇستالعان.
«نەمولچيKZ» قوعامدىق قورىنىڭ جەتەكشىسى دينا ءتاڭسارىنىڭ مالىمەتىنشە، كۇدىكتىلەر ەڭبەك ميگرانتتارى بولۋى مۇمكىن. قىزدىڭ ءمايىتى 6 ماۋسىم كۇنى تاڭەرتەڭ تابىلعان.
«ازىرگە 16 جاستاعى قىزدىڭ وتباسىنا تيەسىلى دۇكەندە جۇمىس ىستەگەنى بەلگىلى. ول ۇيىنە قايتىپ بارا جاتقاندا ءبىر توپ ەڭبەك ميگرانتتارى ۇستاپ اكەتىپ، زورلاعان»، – دەپ جازدى قوردىڭ مۇشەلەرى.
وسى وقيعاعا قاتىستى تۇركىستان وبلىستىق پوليتسيا دەپارتامەنتى پىكىر ءبىلدىردى. پوليتسيا مالىمەتىنشە، كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
«6 ماۋسىم كۇنى ساعات 07:05-تە تۇركىستان وبلىسى ورداباسى اۋدانى تورتكۇل اۋىلىندا ءبىر قىزدىڭ ءمايىتى تابىلدى. ول — كوللەدجدىڭ ءبىرىنشى كۋرس ستۋدەنتى. كۇدىكتى ءىزىن سۋىتپاي ۇستالىپ، ۋاقىتشا ۇستاۋ يزولياتورىنا قامالدى. قىلمىستىق ءىس قوزعالدى. بولعان وقيعانىڭ بارلىق ءمان-جايىن انىقتاۋ ءۇشىن تەرگەۋ امالدارى جۇرگىزىلىپ جاتىر. قىلمىستىق ءىستىڭ تەرگەۋ بارىسى پوليتسيا دەپارتامەنتى باسشىلىعىنىڭ قاتاڭ باقىلاۋدا ۇستايدى»، – دەپ جازدى پوليتسيا باسقارماسى.
