تۇركىستان وبلىسىندا قىتاي حالىق رەسپۋبليكاسىنىڭ ازاماتشاسىنا قاتىستى بولۋى مۇمكىن جىنىستىق سيپاتتاعى قىلمىس فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر، دەپ حابارلايدى "ادىرنا" ۇلتتىق پورتالى "پيسما پرەزيدەنتۋ" تەلەگرام ارناسىنا سىلتەپ.
الەۋمەتتىك جەلىلەردە كۇدىكتى رەتىندە بايدىبەك اۋداندىق ءماسليحاتىنىڭ دەپۋتاتى ەرعالي امانباەۆتىڭ ەسىمى اتالىپ جاتىر. الايدا قۇقىق قورعاۋ ورگاندارى كۇدىكتىنىڭ جەكە باسىن رەسمي تۇردە جاريالاعان جوق. تۇركىستان وبلىسى پد دەرەگىنشە، اتالعان فاكتى بويىنشا قىلمىستىق ءىس قوزعالىپ، سوتقا دەيىنگى تەرگەۋ باستالعان.
«اتالعان دەرەك بويىنشا سوتقا دەيىنگى تەرگەۋ جۇرگىزىلۋدە. كۇدىكتى رەتىندە شىمكەنت قالاسىنىڭ تۇرعىنى انىقتالىپ، قاماۋعا الىندى»، – دەپ حابارلادى ۆەدومستۆونىڭ ءباسپاسوز قىزمەتى.
پوليتسيا وقيعانىڭ بارلىق ءمان-جايىن انىقتاپ جاتقانىن اتاپ ءوتتى. تەرگەۋ قۇپياسىنا بايلانىستى وزگە اقپارات جاريا ەتىلمەيدى. بۇعان دەيىن بۇقارالىق اقپارات قۇرالدارى مەن الەۋمەتتىك جەلىلەردە الماتى تۇرعىنىنىڭ قىتايدان كەلگەن ينۆەستورلاردى بايدىبەك اۋدانىنداعى بايجانساي اۋىلىنا الىپ بارعانى، كەيىن ولاردىڭ ءبىرى زورلىق-زومبىلىققا ۇشىرادى دەگەن اقپارات تاراعان.
قۇقىق قورعاۋ ورگاندارى تەرگەۋ اياقتالعانعا دەيىن كۇدىكتىنىڭ كىناسى سوتتا دالەلدەنبەيىنشە، ونىڭ كىناسىزدىك پرەزۋمپتسياسى ساقتالاتىنىن ەسكە سالادى.
