جەتىسۋ وبلىسىنىڭ اقسۋ اۋدانىنا قاراستى بالاساز اۋىلىندا 32 جاستاعى ايزات جۇمانوۆا جانتۇرشىگەرلىك جاعدايدا كوز جۇمدى. قايعىلى وقيعا 22 ماۋسىمدا بولعان، دەپ حابارلايدى "ادىرنا" ۇلتتىق پورتالى.
مارقۇمنىڭ تۋىستارى ونىڭ ولىمىنە كۇيەۋى جانبولات ايباردى كىنالاپ وتىر. ايتۋلارىنشا، ەر ادام ايەلىن بىرنەشە ساعات بويى ۇرىپ-سوعىپ، ارقانمەن اتتىڭ جالىنا بايلاپ سۇيرەگەن. جابىرلەنۋشى اۋىر حالدە تۇنگى ساعات 2:30 شاماسىندا تالدىقورعانداعى وبلىستىق اۋرۋحاناعا جەتكىزىلگەنىمەن، ول اۋرۋحاناعا جەتپەي جولدا كوز جۇمعان.
دارىگەرلەر ايزات جۇمانوۆانىڭ ميى زاقىمدانعانىن، جامباس سۇيەكتەرى مەن باس سۇيەگى سىنعانىن، سونداي-اق دەنەسىنىڭ كوپتەگەن بولىگىندە اۋىر جاراقاتتار بولعانىن مالىمدەگەن. الايدا كۇدىكتى اۋرۋحانا قىزمەتكەرلەرىنە ايەلىنىڭ “ەكىنشى قاباتتان قۇلاعانىن” ايتقان.
قازىرگى ۋاقىتتا بۇل ءىس بويىنشا قىلمىستىق ءىس قوزعالدى. وقيعانىڭ ناقتى ءمان-جايى تەرگەۋ بارىسىندا انىقتالىپ جاتىر.
ايتا كەتەيىك، الەۋمەتتىك جەلىدە كۇدىكتى جانبولات ايباردىڭ اقسۋ اۋدانىنا قاراستى اراسان اۋىلدىق وكرۋگى اكىمدىگىنە ۇمىتكەر بولعانى تۋرالى اقپارات تاراعان.
