4–6 ماۋسىم ارالىعىندا تاشكەنت، تەرمەز جانە سامارقاند قالالارىندا ورتالىق جانە وڭتۇستىك ازيا اراسىنداعى ءوزارا بايلانىس ماسەلەلەرىنە ارنالعان تەرمەز ديالوگىنىڭ ەكىنشى وتىرىسى ءوتتى. بۇل حالىقارالىق فورۋم 2025 جىلى وزبەكستان پرەزيدەنتى شاۆكات ميرزيوەۆ باستاماسىمەن قۇرىلعان.
بيىلعى جيىننىڭ تاقىرىبى —«بەيبىتشىلىك، بايلانىستىلىق، تۇراقتىلىق: ورتاق وركەندەۋدىڭ نەگىزىن قالىپتاستىرۋ».
حالىقارالىق فورۋمدى وزبەكستان پرەزيدەنتى جانىنداعى ستراتەگيالىق جانە وڭىرارالىق زەرتتەۋلەر ينستيتۋتى مەن وزبەكستان رەسپۋبليكاسىنىڭ سىرتقى ىستەر مينيسترلىگى ازياداعى ءوزارا ءىس-قيمىل جانە سەنىم شارالارى جونىندەگى كەڭەس-پەن سەرىكتەستىكتە ۇيىمداستىردى.
ءىس-شاراعا ورتالىق جانە وڭتۇستىك ازيا، ەۋروپا، تمد، ازيا-تىنىق مۇحيتى ءوڭىرى، تاياۋ شىعىس جانە امەريكا ەلدەرىنەن 150-دەن استام ساياساتكەر، كاسىپكەر، ساراپشى جانە حالىقارالىق ۇيىمداردىڭ وكىلدەرى قاتىستى. فورۋمعا وزبەكستان، اۋعانستان، پاكىستان، تۇرىكمەنستان جانە قازاقستان دەلەگاتسيالارى دا قاتىستى.
كەزدەسۋ بارىسىندا وڭىرارالىق ىنتىماقتاستىقتى نىعايتۋ، كولىك جانە لوگيستيكالىق بايلانىستاردى دامىتۋ، ەكونوميكالىق ارىپتەستىكتى كەڭەيتۋ، سونداي-اق ايماقتىق قاۋىپسىزدىك پەن تۇراقتى دامۋدى قامتاماسىز ەتۋ ماسەلەلەرى تالقىلاندى.
