وزبەكستانداعى فەرعانا قالاسىنىڭ تۇرعىنى الەۋمەتتىك جەلىدە ەل پرەزيدەنتى شاۆكات ميرزيوەۆكە ءتىل تيگىزگەنى ءۇشىن جەتى جىلعا باس بوستاندىعىنان ايىرىلدى، دەپ حابارلايدى «ادىرنا» ءتىلشىسى fergana.agency-كە سىلتەمە جاساپ.
ول Facebook-تە مەملەكەت باسشىسىنا ارنالعان ولەڭدەر مەن ءتۇرلى ۆيدەولاردى جاريالعان.
باسىلىم جىل باسىنان بەرى مەملەكەت باسشىسى پەن ونىڭ وتباسى مۇشەلەرىن ەل الدىندا بالاعاتتادى دەگەن ايىپپەن كەم دەگەندە ون ادامنىڭ سوتتالعانىن جازدى.
بۇعان دەيىن حالىقارالىق Human Rights Watch قۇقىق قورعاۋ ۇيىمى 2023 جىلى وزبەكستاندا ادام قۇقىعى جاعدايى ناشارلاعانىن مالىمدەگەن ەدى.
ەسكە سالايىق، 2021 جىلى وزبەكستاندا پرەزيدەنت تاراپىنا قورلاۋ نەمەسە جالا جابۋ دەرەگىنە قاتىستى قىلمىستىق جاۋاپكەرشىلىك ەنگىزىلدى. قىلمىستىق كودەكستىڭ 158-بابىنىڭ 3-بولىگى ("وزبەكستان رەسپۋبليكاسى پرەزيدەنتىن جاريا تۇردە قورلاۋ نەمەسە جالا جابۋ، سول سياقتى ءباسپاسوز نەمەسە وزگە دە بۇقارالىق اقپارات قۇرالدارىن، تەلەكوممۋنيكاتسيا جەلىلەرىن نەمەسە ينتەرنەتتى پايدالانۋ") بويىنشا ءۇش جىلعا دەيىن تۇزەۋ جۇمىستارىنا نەمەسە ەكى جىلدان بەس جىلعا دەيىنگى مەرزىمگە باس بوستاندىعىن شەكتەۋ نە بەس جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.
«وزبەكستان رەسپۋبليكاسى پرەزيدەنتى قىزمەتىنىڭ نەگىزگى كەپىلدىكتەرى تۋرالى» زاڭنىڭ 4-بابىنا سايكەس، پرەزيدەنتتىڭ ار-نامىسى مەن قادىر-قاسيەتىنە نۇقسان كەلتىرۋگە جول بەرىلمەيدى جانە ول زاڭ بويىنشا جاۋاپكەرشىلىككە تارتىلادى.
