فوتو: Paul Sancya/AP Photo/picture alliance
اقش-تىڭ وگايو شتاتىنداعى توليدو قالاسىندا وتكەن Old West End فەستيۆالى ماڭىندا بولعان اتىس سالدارىنان كەمىندە 12 ادام وق جاراقاتىن الدى. ولاردىڭ ەكەۋىنىڭ جاعدايى اۋىر. بۇل تۋرالى 6 ماۋسىم كۇنى پوليتسيا باسشىسىنىڭ ورىنباسارى دجوزەف حەففەرنان مالىمدەدى، دەپ حابارلايدى "ادىرنا".
ونىڭ ايتۋىنشا، كۇدىكتىلەر ازىرگە ۇستالعان جوق.
الدىن الا مالىمەت بويىنشا، وقيعاعا كەمىندە ەكى ادام قاتىسىپ، ولار ءبىر-بىرىنە وق اتقان بولۋى مۇمكىن. پوليتسيا قىزمەتكەرى دەن گەركەننىڭ سوزىنشە، زارداپ شەككەندەردىڭ ورتاشا جاسى 20-دان اسقان.
قازىر قۇقىق قورعاۋ ورگاندارى كۇدىكتىلەردى ىزدەستىرىپ، كۋاگەرلەردەن جاۋاپ الىپ، ۇيالى تەلەفوندارعا تۇسىرىلگەن بەينەجازبالاردى زەرتتەپ جاتىر. AFP اگەنتتىگىنىڭ حابارلاۋىنشا، تەرگەۋ جۇمىستارى جۇرگىزىلىپ جاتقاندىقتان، پوليتسيا تۇرعىندارعا بىرنەشە كوشەدەن ۋاقىتشا اۋلاق بولۋدى ەسكەرتكەن. وقيعا ورنىندا ءالى دە پوليتسيا قىزمەتكەرى جۇمىس ىستەۋدە.
وگايو شتاتىنىڭ گۋبەرناتورى مايك دەۆاين الەۋمەتتىك جەلىدەگى پاراقشاسىندا: «جازعى فەستيۆالدەر وتباسىلار قاۋىپسىز دەمالىپ، ۋاقىت وتكىزەتىن ورىن بولۋى ءتيىس. ءبىز بۇل ءمانسىز قىلمىسقا قاتىسى بار كۇدىكتىلەردى قۇقىق قورعاۋ ورگاندارى مىندەتتى تۇردە تاباتىنىنا سەنىمدىمىز»، – دەپ جازدى.
قارۋمەن جاسالعان زورلىق-زومبىلىق وقيعالارىنىڭ ستاتيستيكاسىن جۇرگىزەتىن Gun Violence Archive ۇيىمىنىڭ دەرەگىنە سايكەس، بيىلعى جىلدىڭ باسىنان بەرى اقش-تا جاپپاي اتىسقا قاتىستى كەمىندە 170 وقيعا تىركەلگەن.
Old West End – توليدو قالاسىنداعى تاريحي اۋداننىڭ جىل سايىن وتەتىن ەكى كۇندىك فەستيۆالى. ۆيكتوريا ءداۋىرىنىڭ ساۋلەتى ساقتالعان بۇل اۋداندا ۇيىمداستىرىلاتىن شارا باعدارلاماسىنا شەرۋ، جاندى مۋزىكا كونتسەرتتەرى جانە گاسترونوميالىق كورمەلەر ەنگىزىلگەن.
