قازاقستاندا 16 ماۋسىمنان باستاپ پروكاتقا شىعاتىن بارلىق فيلمدەر مىندەتتى تۇردە ساراپتامادان ءوتىپ، ارنايى رۇقسات قۇجاتىن الۋى ءتيىس. بۇل تالاپ مادەنيەت جانە اقپارات مينيسترلىگى ەنگىزگەن جاڭا ەرەجەگە سايكەس جۇزەگە اسىرىلادى، دەپ حابارلايدى "ادىرنا".
جاڭا ءتارتىپ بويىنشا ءار فيلمگە پروكاتقا شىعار الدىندا ساراپتاما جۇرگىزىلەدى. ساراپشىلار تۋىندىنىڭ مازمۇنىن زەردەلەپ، وندا كونستيتۋتسيالىق قۇرىلىستى بۇزۋعا، ەلدىڭ تۇتاستىعىنا نۇقسان كەلتىرۋگە باعىتتالعان ۇگىت-ناسيحاتتىڭ، سونداي-اق الەۋمەتتىك، ۇلتتىق نەمەسە ءدىني الاۋىزدىقتى قوزدىراتىن كورىنىستەردىڭ بار-جوعىن انىقتايدى.
بۇدان بولەك، فيلمدەر قاتىگەزدىك پەن زورلىق-زومبىلىقتى ناسيحاتتاۋ، پورنوگرافيا، پەدوفيليا جانە ءداستۇرلى ەمەس سەكسۋالدىق قاتىناستاردى دارىپتەۋ بەلگىلەرىنىڭ بولۋىنا دا تەكسەرىلەدى.
ساراپتامادان ءوتۋ ءۇشىن ديستريبيۋتورلار ءفيلمنىڭ كينوتەاترلاردا كورسەتىلەتىن نۇسقاسىن ۇسىنۋى قاجەت. كوميسسيا مۇشەلەرى كارتينانى تولىق قاراپ شىعىپ، مازمۇنىنا تالداۋ جاسايدى. كەيىن ماسەلە كوميسسيا وتىرىسىندا تالقىلانىپ، داۋىس بەرۋ ارقىلى قورىتىندى شەشىم قابىلدانادى.
مينيسترلىك جانىنان قۇرىلعان كوميسسيا قۇرامىنا كينو سالاسىنىڭ ماماندارى، تاريحشىلار، پسيحولوگتار جانە قوعام وكىلدەرى ەنگەن.
ساراپتامانىڭ وڭ قورىتىندىسىن الىپ، ءتيىستى قۇجاتتى راسىمدەگەن فيلمدەر عانا قازاقستان اۋماعىندا رەسمي تۇردە كورسەتىلە الادى. ال تالاپتارعا سايكەس كەلمەگەن تۋىندىلارعا پروكاتقا شىعۋعا رۇقسات بەرىلمەيدى.
