رەسەي ازاماتتارى 2025 جىل مەن 2026 جىلدىڭ ءبىرىنشى توقسانى ارالىعىندا قىرعىزستاننان 1238 جىلجىمايتىن مۇلىك نىسانىن ساتىپ العان. بۇل اتالعان كەزەڭدە شەتەل ازاماتتارى جاساعان بارلىق مامىلەنىڭ 51 پايىزدان استامىن قۇرايدى، دەپ حابارلايدى «ادىرنا» ءتىلشىسى fergana-عا سىلتەمە جاساپ.
قىرعىزستاننىڭ جىلجىمايتىن مۇلىككە قۇقىقتاردى تىركەۋ جونىندەگى مەملەكەتتىك اگەنتتىگىنىڭ رەسمي دەرەكتەرىن جوعارعى كەڭەس دەپۋتاتى داستان بەكەشەۆ جاريالادى. مالىمەتكە سايكەس، سوڭعى ءبىر جارىم جىلدا شەتەل ازاماتتارى رەسپۋبليكادا جىلجىمايتىن مۇلىكتى ساتىپ الۋ-ساتۋ بويىنشا 2408 مامىلە راسىمدەگەن.
ساتىپ الىنعان نىساندار سانى بويىنشا العاشقى بەس ەل:
رەسەي — 1238 مامىلە;
قازاقستان — 424 مامىلە;
قىتاي — 311 مامىلە;
تۇركيا — 145 مامىلە;
گەرمانيا — 56 مامىلە.
وسىلايشا، رەسەي ازاماتتارى جىلجىمايتىن مۇلىك ساتىپ الۋ بويىنشا كوش باستاپ تۇر. ولار قازاقستان ازاماتتارىنان شامامەن ءۇش ەسە كوپ نىسان ساتىپ العان.
قىرعىزستانداعى جىلجىمايتىن مۇلىك نارىعىنداعى شەتەلدىكتەردىڭ ۇلەسى ماسەلەسىن ءجيى كوتەرىپ جۇرگەن دەپۋتات داستان بەكەشەۆ بۇعان دەيىن بىرنەشە رەت رەزيدەنت ەمەس تۇلعالاردىڭ تۇرعىن ءۇي ساتىپ الۋ تالاپتارىن قاتاڭداتۋدى، اتاپ ايتقاندا، شەتەلدىكتەر ءۇشىن جوعارى سالىق مولشەرلەمەلەرىن ەنگىزۋدى ۇسىنعان بولاتىن.
قىرعىزستاننىڭ جەر رەسۋرستارى جونىندەگى مەملەكەتتىك اگەنتتىگىنىڭ رەسمي دەرەكتەرىنە سايكەس، ەلدە 3,5 ميلليوننان استام جىلجىمايتىن مۇلىك نىسانى تىركەلگەن. ونىڭ شامامەن 20 مىڭى عانا شەتەل ازاماتتارىنىڭ اتىنا راسىمدەلگەن. قولدانىستاعى زاڭناماعا سايكەس، شەتەلدىكتەر قىرعىزستاندا جىلجىمايتىن مۇلىك نىساندارىن ساتىپ الا الادى. الايدا جەر ۋچاسكەلەرىن مەنشىككە يەلەنۋگە قۇقىعى جوق، ولاردى تەك جالعا الا الادى.
