سەمەيدە پوليتسەيلەر ءيتتى ءولتىردى دەگەن كۇدىكپەن ەر ادامدى ۇستادى. بۇل تۋرالى اباي وبلىسىنىڭ پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
7 ماۋسىمعا قاراعان ءتۇنى قۇقىق قورعاۋ ورگاندارىنا جەكە ءۇيدىڭ تۇرعىندارى حابارلاسقان. ولاردىڭ ايتۋىنشا، بۇرىنعى كۇيەۋ بالاسى ءيتتى اتىپ ولتىرگەن.
وقيعا ورنىنا كەلگەن پوليتسيا قىزمەتكەرلەرى كۇدىكتىنى ۇستاعان. ۇستالعان كەزدە ونىڭ ماس كۇيدە بولعانى انىقتالدى. ەر ادام ءمان-جايدى انىقتاۋ ءۇشىن پوليتسيا بولىمىنە جەتكىزىلگەن.
«وقيعا بويىنشا قىلمىستىق ءىس قوزعالدى. بۇدان بولەك، ەر ادام ماس كۇيدە كولىك باسقارعانى، ۇساق بۇزاقىلىق جاساعانى، سونداي-اق ازاماتتىق قارۋدى ساقتاۋ، الىپ ءجۇرۋ جانە پايدالانۋ قاعيدالارىن بۇزعانى ءۇشىن بىرنەشە اكىمشىلىك قۇقىق بۇزۋشىلىق بويىنشا جاۋاپكەرشىلىككە تارتىلدى»، – دەلىنگەن حابارلامادا.
سونداي-اق تاركىلەنگەن مىلتىقتى ساقتاۋ جانە الىپ ءجۇرۋ رۇقساتىن جويۋ تۋرالى شەشىم قابىلدانعان. جينالعان اكىمشىلىك ماتەريالدار سوتقا جولدانعان.
«سوتقا دەيىنگى تەرگەپ-تەكسەرۋ بارىسى اباي وبلىسى پوليتسيا دەپارتامەنتى باسشىلىعىنىڭ باقىلاۋىندا»، – دەپ قوستى ۆەدومستۆونىڭ ءباسپاسوز قىزمەتى.
