الەمدىك كوشباسشىلار ارمەنيا پرەمەر-ءمينيسترى نيكول پاشينياندى پارلامەنتتىك سايلاۋداعى جەڭىسىمەن قۇتتىقتاپ جاتىر. قۇتتىقتاۋ جولداعانداردىڭ قاتارىندا ەو ەلدەرىنىڭ باسشىلارى، قازاقستان مەن ۋكراينا پرەزيدەنتتەرى جانە وزگە دە مەملەكەت باسشىلارى بار، دەپ حابارلايدى «ادىرنا» ءتىلشىسى.
«قۇرمەتتى نيكول پاشينيان، سايلاۋداعى جەڭىسىڭىزبەن قۇتتىقتايمىن. ءبىز دەموكراتيالىق ارمەنيامەن سەرىكتەستىكتى جوعارى باعالايمىز، ول ەۋروپاعا بارعان سايىن جاقىنداپ كەلەدى. ارمەنيا بىزگە سەنە الادى»، – دەپ جازدى ەۋروكوميسسيا ءتورايىمى ۋرسۋلا فون دەر ليايەن.
فرانتسيا پرەزيدەنتى ەممانۋەل ماكرون دا قۇتتىقتاۋ جولداپ، پاشينياندى «سەنىمدى جەڭىسىمەن» قۇتتىقتادى. ول ءوز حاتىندا ەرەۆانمەن ىنتىماقتاستىقتى نىعايتۋ، بەيبىتشىلىك پەن ارمەنيانىڭ ەگەمەندىگىن قولداۋ جانە ەۋروپامەن جاقىنداسۋ ۇدەرىسىن بىرگە جالعاستىرۋعا دايىن ەكەنىن ءبىلدىردى.
ۋكراينا پرەزيدەنتى ۆلاديمير زەلەنسكي دە پاشينيان مەن ونىڭ «ازاماتتىق كەلىسىم» پارتياسىن جەڭىسىمەن قۇتتىقتادى. ونىڭ ايتۋىنشا، بۇل – ارمەنيا ەگەمەندىگى مەن حالىقتىڭ ءوز جولىن تاڭداۋ قۇقىعىنىڭ جەڭىسى.
زەلەنسكي سونداي-اق ۋكراينا ىنتىماقتاستىقتى كەڭەيتۋگە دايىن ەكەنىن ايتىپ، ەۋرووداققا ارمەنيانى ناقتى قولداۋعا شاقىردى. ول بۇل جاعدايدى ەو ءۇشىن سىناق دەپ اتاپ، «ۋاقىتتى جوعالتپاۋ ماڭىزدى» ەكەنىن ەسكەرتتى.
ليتۆا پرەزيدەنتى ەدگارس رينكەۆيچس پاشينياندى «ايقىن جەڭىسپەن» قۇتتىقتاپ، ارمەنيانىڭ قاۋىپ-قاتەر مەن قىسىمعا قاراماستان دەموكراتيالىق جولدى تاڭداعانىن اتاپ ءوتتى. ول لاتۆيانىڭ ارمەنيا مەن ەو اراسىنداعى جاقىن قارىم-قاتىناستى قولدايتىنىن جەتكىزدى.
ال ماسكەۋ ەرەۆاندى پرورەسەيلىك كۇشتەرگە قىسىم جاسادى، ەو-نى سايلاۋعا ارالاستى دەپ ايىپتادى. رەسەي ءسىم وكىلى ماريا زاحاروۆا ارمەنيادا رەسەيمەن بايلانىستاردى دامىتۋعا جانە ەلدىڭ «ەۋرازيالىق ينتەگراتسيالىق قۇرىلىمداردا» قالۋىنا سۇرانىس بار ەكەنىنە سەنىم ءبىلدىردى. ونىڭ ايتۋىنشا، ارمەنيا بيلىگى رەسەيمەن بايلانىستى كۇشەيتۋدى قولدايتىن پارتيالاردى عانا قۋدالاپ وتىر. ول ارميان حالقىن «باۋىرلاس حالىق» دەپ اتاپ، بەيبىتشىلىك پەن وركەندەۋ تىلەدى. سونىمەن قاتار ماسكەۋ ارمەنيا ۇكىمەتىنىڭ ناقتى ارەكەتتەرىنە قاراي ساياساتىن ايقىندايتىنىن مالىمدەدى.
ارمەنيادا 7 ماۋسىمدا وتكەن پارلامەنتتىك سايلاۋدا پاشينياننىڭ «ازاماتتىق كەلىسىم» پارتياسى ايقىن جەڭىسكە جەتكەن ەدى. ەلدىڭ ورتالىق سايلاۋ كوميسسياسىنىڭ مالىمەتىنشە، «ازاماتتىق كەلىسىم» پارتياسى بارلىق داۋىس سانالعاننان كەيىن جەڭىسكە جەتىپ، شامامەن 727 مىڭ داۋىس جيناعان. بۇل جالپى داۋىس سانىنىڭ 49,81 پايىزىن قۇرايدى.
بۇعان دەيىن پرەزيدەنت قاسىم-جومارت توقاەۆتىڭ العاشقى بولىپ ءپاشينياندى قۇتتىقتاعانىن جازعان ەدىك.
