اقمولا – ايماق ەمەس، ايرىقشا كەڭىستىك. بۇل ءوڭىردىڭ تابيعاتى دا، تاعدىرى دا، تاريحى دا تەرەڭ. سوڭعى جىلدارى سول كەڭىستىكتىڭ جاڭا تىنىسى اشىلىپ، بۋراباي باۋرايى قايتا تۇلەپ، ەل نازارىن وزىنە اۋدارىپ وتىر. ەندى، مىنە، ءبىر جىلدىڭ ىشىندە 2 ميلليون تۋريست قابىلداۋ مەجەسى قويىلىپ وتىر. بۇل جاي عانا ستاتيستيكا ەمەس – بۇل ءوڭىردىڭ ەكونوميكالىق، مادەني جانە تۋريستىك الەۋەتىنىڭ جاڭا بەلەسى.
جازعى ماۋسىم – تابيعاتتىڭ عانا ەمەس، ءتۋريزمنىڭ دە قىزاتىن شاعى. وسى كەزەڭدە اقمولا وبلىسىنا كەلۋشىلەر سانى كۇرت ارتادى دەگەن بولجام بار. اقمولا وبلىسى تۋريزم باسقارماسىنىڭ مالىمەتىنشە، وڭىرگە جىل ىشىندە شامامەن 2 ميلليونعا جۋىق تۋريست كەلەدى دەپ كۇتىلۋدە. سول كوپتىڭ باعىتى تاعى دا بۋرابايعا بۇرىلماق. بۇل – زاڭدىلىق. ويتكەنى كوكشەنىڭ كوركى، بۋرابايدىڭ سۇلۋلىعى – عاسىرلار بويى حالىق جادىندا ساقتالعان، سان بۋىندى تاڭعالدىرعان تابيعي قۇبىلىس.
بۇل باعىتتاعى جۇمىستاردىڭ جۇيەلى جۇرگىزىلىپ جاتقانىن باسقارمانىڭ ءباسپاسوز قىزمەتى دە اتاپ ءوتتى.
ء«وڭىردىڭ تۋريستىك الەۋەتىن ارتتىرۋ – ءبىزدىڭ نەگىزگى باسىمدىقتارىمىزدىڭ ءبىرى. بيىل ينفراقۇرىلىمدى جاڭعىرتۋ، جاڭا مارشرۋتتاردى ىسكە قوسۋ جانە حالىقارالىق دەڭگەيدەگى قوناقۇي كەشەندەرىن اشۋ ارقىلى بۋراباي كۋرورتتىق ايماعىن جاڭا ساپالىق دەڭگەيگە كوتەرۋدى كوزدەپ وتىرمىز. تۋريستەر ءۇشىن قولايلى ءارى قاۋىپسىز ورتا قالىپتاستىرۋ – باستى مىندەت»، – دەدى ۆەدومستۆونىڭ ءباسپاسوز قىزمەتى.
بۇگىندە سول تابيعي بايلىقتى ءتيىمدى پايدالانۋ، ونى زاماناۋي تۋريزم تالاپتارىنا ساي ۇسىنۋ – باستى مىندەتتەردىڭ ءبىرى. بۇل باعىتتا اۋقىمدى جۇمىستار اتقارىلىپ جاتىر. تۋريستىك مارشرۋتتاردى جاڭعىرتۋ – سونىڭ ايقىن كورىنىسى. بۇرىننان بار ون باعىت قايتا اباتتاندىرىلىپ، جاڭاشا سيپات الدى. ال جوكەي كولى مەن اقىلباي اۋىلى ماڭىندا اشىلاتىن جاڭا مارشرۋتتار – ءوڭىردىڭ تۋريستىك كارتاسىن كەڭەيتىپ، جاڭا تىنىس بەرمەك.
بۋرابايدىڭ ىشكى ينفراقۇرىلىمى دا تۇبەگەيلى وزگەرىستەرگە ۇشىراپ وتىر. سەگىز بىردەي باقىلاۋ الاڭى سالىندى. بۇل – تەك قاۋىپسىزدىك ەمەس، تابيعاتتى تاماشالاۋدىڭ مادەنيەتىن قالىپتاستىرۋ. جاڭا ساياباق ايماعى اشىلىپ، دەمالۋشىلار ءۇشىن 45 پيكنيك ورنى جابدىقتالدى. ۆەلوسيپەد جولىنىڭ ۇزىندىعى 30 شاقىرىمنان اسىپ، تاعى 10 شاقىرىمعا ۇزارۋى – بەلسەندى دەمالىستى تاڭداعاندار ءۇشىن ۇلكەن مۇمكىندىك. ال سانيتارلىق-گيگيەنالىق توراپتاردىڭ ورناتىلۋى – تۋريزم مادەنيەتىنىڭ اجىراماس بولىگى.
كولىك قولجەتىمدىلىگى – ءتۋريزمنىڭ كۇرەتامىرى. وسى رەتتە ششۋچينسك قالاسىنداعى جاڭعىرتىلعان تەمىرجول ۆوكزالىنىڭ ىسكە قوسىلۋى – ماڭىزدى قادام. بۇل تەك عيمارات ەمەس، بۇل – وڭىرگە اشىلعان جاڭا قاقپا. جاڭا اۆتوبۋس باعىتتارىنىڭ ىسكە قوسىلۋى دا كەلۋشىلەردىڭ جايلىلىعىن قامتاماسىز ەتپەك.
قوناقۇي ينفراقۇرىلىمىنىڭ دامۋى – ينۆەستيتسيالىق تارتىمدىلىقتىڭ كورسەتكىشى. شىلدە ايىندا اشىلاتىن Mövenpick كەشەنى مەن جىل سوڭىنا جوسپارلانعان Radisson Blu Burabay – حالىقارالىق دەڭگەيدەگى سەرۆيستىڭ ايقىن دالەلى. Dolce by Wyndham جوباسىنىڭ جالعاسۋى جانە Holiday Inn Resort Burabay قۇرىلىسىنىڭ باستالۋى – ءوڭىر ءتۋريزمىنىڭ جۇيەلى دامىپ كەلە جاتقانىن اڭعارتادى.
الداعى ۋاقىتتا بۋرابايدىڭ جاڭا كەلبەتىنە اينالۋى مۇمكىن جوبالاردىڭ ءبىرى – زاماناۋي كونگرەسس-ورتالىق. بۇل تەك تۋريزم عانا ەمەس، ىسكەرلىك، حالىقارالىق كەزدەسۋلەردىڭ ورتالىعىنا اينالۋ مۇمكىندىگىن بەرەدى. قازىرگى تاڭدا ونىڭ جوبالىق قۇجاتتارى مەملەكەتتىك ساراپتامادان وتۋدە.
قاۋىپسىزدىك – كەز كەلگەن تۋريستىك ايماقتىڭ باستى ولشەمى. بۇل تۇرعىدا دا ناقتى جۇمىستار اتقارىلعان. 40 پوليتسيا قىزمەتكەرى مەن 123 «اقىلدى» كامەرادان تۇراتىن ينتەللەكتۋالدى جۇيە تاۋلىك بويى باقىلاۋ جۇرگىزەدى. ششۋچينسك، بۋراباي جانە ۇلكەن شاباقتى كولدەرىندەگى قۇتقارۋ ستانتسيالارى كۇشەيتىلگەن رەجيمدە جۇمىس ىستەۋدە.
وسىنىڭ ءبارى – ءبىر ماقساتقا باعىتتالعان جۇيەلى قادامدار. ول – اقمولا ءوڭىرىن ورتالىق ازياداعى جەتەكشى تۋريستىك ورتالىقتاردىڭ بىرىنە اينالدىرۋ. بۇل جولدا تابيعات پەن تەحنولوگيا، ءداستۇر مەن جاڭاشىلدىق قاتار ءورىلىپ كەلەدى.
بۋراباي – جاي عانا دەمالىس ورنى ەمەس. ول – قازاقتىڭ تابيعاتپەن تىلدەسكەن، رۋحپەن ۇندەسكەن مەكەنى. ەندىگى مىندەت – سول مۇرانى ساقتاي وتىرىپ، ونى الەمگە تانىتۋ. ال 2 ميلليون تۋريست – سول جولداعى العاشقى مەجە عانا.
