بيىل كوكشەتاۋ ءوڭىردىڭ مادەني ورتالىعى رەتىندەگى مارتەبەسىن تاعى ءبىر مارتە دالەلدەپ، ناۋرىز مەرەكەسىن جارقىن ءارى مازمۇندى ءىس-شارالار لەگىنە اينالدىردى. ءبىر مەزەتتە «قارا جورعا» ءبيىن جاپپاي ورىنداۋ جانە «بەس اسىق» ۇلتتىق ويىنىن قاتار ويناۋ بويىنشا ەكى بىردەي جەتىستىك قازاقستان رەكوردتار كىتابىنا ەندى. سونىمەن قاتار، قالادا 50 تاقىرىپتىق كيىز ۇيدەن تۇراتىن بىرەگەي جوبا جۇزەگە اسىرىلدى.
ەڭ اسەرلى ساتتەردىڭ ءبىرى – «قارا جورعا» ءبيىنىڭ جاپپاي ورىندالۋى بولدى. ءبىر الاڭدا 2 مىڭنان استام ەر ازامات – اقساقالدار، زيالى قاۋىم وكىلدەرى، ەڭبەك ۇجىمدارى، اسكەري قىزمەتشىلەر، سپورتشىلار مەن جاستار ءبىر ىرعاقتا بي بيلەدى. ۇلتتىق شاپان كيگەن قاتىسۋشىلاردىڭ ۇيلەسىمدى قيمىلى ۇرپاقتار ساباقتاستىعىنىڭ سيمۆولىنا اينالىپ، قوعامدىق بىرلىكتىڭ جارقىن كورىنىسىن كورسەتتى.
سونىمەن قاتار ءوڭىر تاعى ءبىر رەكورد ورناتتى: 1500 مەكتەپ وقۋشىسى ءبىر ۋاقىتتا «بەس اسىق» ويىنىن وينادى. بۇل اۋقىمدى شارا جاس ۇرپاقتىڭ ۇلتتىق داستۇرلەر مەن مادەني مۇراعا دەگەن قىزىعۋشىلىعىنىڭ ارتىپ كەلە جاتقانىن ايقىن كورسەتتى. ەكى جەتىستىك تە رەسمي تۇردە قازاقستان رەكوردتار كىتابىنا تىركەلىپ، ۇيىمداستىرۋ دەڭگەيىنىڭ جوعارى ەكەنىن جانە تۇرعىنداردىڭ بەلسەندى قاتىسۋىن دالەلدەدى.
مەرەكەلىك شارالار 50 كيىز ۇيدەن قۇرالعان ەتنواۋىلمەن جالعاسىن تاپتى. ءاربىر كيىز ءۇي جەكە مادەني كەڭىستىككە اينالىپ، قوناقتارعا حالىق قولونەرى، سالت-داستۇرلەر، ۇلتتىق تاعامدار مەن ادەت-عۇرىپتاردى تانىستىردى. سونىمەن قاتار ينتەراكتيۆتى شەبەرلىك ساباقتارى مەن ۇلتتىق ويىندار ۇيىمداستىرىلدى. ەرەكشە نازار كوكشەتاۋدىڭ تاريحي جولى مەن بۇگىنگى دامۋىن كورسەتەتىن تاقىرىپتىق كورمەلەرگە اۋدارىلدى.
اقمولا وبلىسىنىڭ اكىمى مارات احمەتجانوۆ ناۋرىز مەيرامىنىڭ ءبىزدىڭ حالقىمىز ءۇشىن ماڭىزىن ايتىپ، قۇتتىقتاۋ لەبىزىن ءبىلدىردى.
«قاسيەتتى اقمولا جەرى – قاشاندا ەلدىكتىڭ تۋى تىگىلگەن، بىرلىكتىڭ بەسىگى بولعان، اسىل ونەردى باعالاعان دارىندى تۇلعالار مەكەنى. بۇگىن التى جاسار بالادان الپىس جاستاعى كəرىگە دەيىن ەر ازاماتتارىمىز «قارا جورعا» ءبيىنىڭ كەرەمەت ۇلگىسىن، حالقىمىزدىڭ رۋحاني بايلىعىن، رۋحىن پاش ەتىپ وتىر.«قارا جورعا» ءبيى – ۇلتتىق بىرەگەيلىگىمىزدىڭ ايعاعى. بۇل بي – تەك قيمىل-قوزعالىس ەمەس.ول – اتتىڭ ءجۇرىسىن، دالانىڭ ەركىندىگىن جانە حالىقتىڭ كوڭىل-كۇيىن سۋرەتتەيتىن ونەر تۋىندىسى. عاسىردان-عاسىرعا جالعاسىپ كەلە جاتقان حالقىمىزدىڭ كيەلى ونەرىن قۇرمەتتەپ، جاڭعىرتۋ، ونى كەيىنگى جاس ۇرپاقتىڭ ساناسىنا ءسىڭىرۋ – ءبىزدىڭ مىندەتىمىز» ، دەدى ول.»
وسىلايشا، كوكشەتاۋدا وتكەن ناۋرىز مەرەكەسى ۇلتتىق داستۇرلەر مەن ورتاق قۇندىلىقتار اياسىندا ءوڭىر تۇرعىندارىن بىرىكتىرگەن، ۇرپاقتار ساباقتاستىعىن دارىپتەگەن ماڭىزدى وقيعاعا اينالدى.
