ورال مەن تسزينچجوۋ باۋىرلاس قالالار اتاندى. باتىس قازاقستان وبلىسى مەن لياونين پروۆينتسياسى اراسىنداعى ىنتىماقتاستىقتى نىعايتۋعا باعىتتالعان ماڭىزدى كەلىسىمگە شەنيان شاھارىندا وتكەن حالىقارالىق كونفەرەنتسيادا قول قويىلدى.
اسپاناستى ەلىندەگى اۋقىمدى ءىس-شاراعا ايماق باسشىسى ناريمان تورەعاليەۆ باستاعان باتىسقازاقستاندىق دەلەگاتسيا ارنايى قاتىستى. 50 مەملەكەتتىڭ وكىلدەرى باس قوسقان جيىندا قىتايدىڭ ءىرى ونەركاسىپتىك ورتالىعى سانالاتىن لياونين پروۆينتسياسىنىڭ الەۋەتى تانىستىرىلدى.
كونفەرەنتسيانىڭ جالپى وتىرىسىندا وبلىس اكىمى ناريمان تورەعاليەۆ ءسوز سويلەپ، وڭىرارالىق ىنتىماقتاستىقتى دامىتۋ بويىنشا ۇسىنىس-پىكىرلەرىن جەتكىزدى.
- باتىس قازاقستان وبلىسى — قىتاي حالىق رەسپۋبليكاسىنىڭ توراعاسى سي ءتسزينپيننىڭ استانا قالاسىندا جاريالاعان ء«بىر بەلدەۋ — ءبىر جول» باستاماسىنىڭ ماڭىزدى ترانزيتتىك تورابى. كەلىسسوزدەر مەن قولداۋدىڭ ناتيجەسىندە قىتايلىق كومپانيالار سۇيىق مەتانول، تسەمەنت زاۋىتتارى، گازتۋربينالىق جانە جەل ەلەكتر ستانسالارىن سالۋعا كىرىستى. وزگە دە جوبا-جوسپارلارىمىز از ەمەس. بىلتىر بقو مەن قىتاي اراسىنداعى تاۋار اينالىمى 1,5 ەسە ءوسىپ، 175 ملن اقش دوللارىنا جەتتى. ءبىز لياونين پروۆينتسياسىمەن يننوۆاتسيالىق شەشىمدەر، جاساندى ينتەللەكت، وڭدەۋ ونەركاسىبى سالاسىندا ينۆەستيتسيالىق بايلانىستاردى ودان ءارى تەرەڭدەتۋگە دايىنبىز، - دەدى ناريمان تورەعاليەۆ.
لياونين پروۆينتسياسىنا قاراستى شاھارلار الەمنىڭ 96 قالاسىمەن باۋىرلاس. بۇگىن بۇل قاتارعا باتىس قازاقستان وبلىسىنىڭ ورتالىعى دا قوسىلدى. ورال مەن تسزينچجوۋ قالالارىنىڭ باسشىلىعى باۋىرلاستىق قاتىناستار ورناتۋ تۋرالى نيەتتەستىك حاتتاماسىنا قول قويدى. ونىڭ اياسىندا تاراپتار ساۋدا-ەكونوميكالىق، عىلىمي-تەحنيكالىق، مادەني-سپورتتىق جانە وزگە دە ماڭىزدى باعىتتار بويىنشا تۇراقتى بايلانىس ورناتۋعا ۋاعدالاستى.
