فوتو: depositphotos.com
يتاليانىڭ وڭتۇستىگىندەگى ۆيبو-ۆالەنتيا پروۆينتسياسىنا قاراستى برياتيكو كوممۋناسىنىڭ جاعالاۋىنان جاس جىگىتتىڭ دەنەسى تابىلدى. جەرگىلىكتى اقپارات قۇرالدارىنىڭ مالىمەتىنشە، قۇتقارۋشىلار ءمايىتتى 9 ماۋسىم كۇنى تاڭەرتەڭ جاعاعا جاقىن ماڭداعى جارتاستاردىڭ اراسىنان بايقاعان، دەپ حابارلايدى "ادىرنا".
العاشىندا قۇتقارۋشىلار قازا تاپقان ادامنىڭ شاشىنىڭ ۇزىندىعىنا قاراپ، جىنىسى ايەل دەپ بولجاعان. الايدا كەيىنىرەك ونىڭ شامامەن 20-30 جاس ارالىعىنداعى ەر ازامات ەكەنى انىقتالدى. يتاليالىق جۋرناليستەردىڭ حابارلاۋىنشا، اقپارات جاريالانعان ساتتە مارقۇمنىڭ اتى-ءجونى رەسمي تۇردە اتالماعان. الدىن الا مالىمەت بويىنشا، جىگىتتىڭ دەنەسى جارتاستار اراسىندا 15 ساعات جاتقان.
ونىڭ دەنەسىندە قارۋ جاراقاتى جوق، جارتاستارعا سوعىلعان جاراقات ىزدەرى بار. قازىرگى ۋاقىتتا پوليتسيا ولىمگە سۋعا باتۋ سەبەپ بولعان دەگەن نۇسقانى قاراپ جاتىر.
Qumash ارناسىنىڭ اقپاراتىنا سۇيەنسەك، قازا تاپقان ازامات - نۇرداۋلەت ماشاريپوۆ. دوسىنىڭ ايتۋىنشا، مارقۇم ورال قالاسىنداعى نازارباەۆ زياتكەرلىك مەكتەبىن ءبىتىرىپ، كاسسينو قالاسىنداعى Unicas ۋنيۆەرسيتەتىنىڭ 3-كۋرسىندا وقىپ جۇرگەن.
«ورال قالاسىنداعى نازارباەۆ زياتكەرلىك مەكتەبىنىڭ تۇلەگى ماشاريپوۆ نۇرداۋلەتتىڭ يتاليادا قايعىلى جاعدايدا ومىردەن وتكەنىن قايعىرا وتىرىپ حابارلايمىز. قازىرگى ۋاقىتتا ونىڭ دەنەسىن وتانىنا، قازاقستانعا، جەتكىزۋ ءۇشىن 8000 ەۋرو قاجەت، قاراجات جينالىپ جاتىر»، - دەپ جازدى دىنمۇحاممەد مۇحتاروۆ.
وقيعاعا قاتىستى قر سىرتقى ىستەر مينيسترلىگى تۇسىنىكتەمە بەردى.
«قازاقستان رەسپۋبليكاسى سىرتقى ىستەر مينيسترلىگى مارقۇمنىڭ تۋعان-تۋىستارى مەن جاقىندارىنا قايعىرىپ كوڭىل ايتادى. قازاقستاننىڭ يتالياداعى ەلشىلىگى مەن يتاليانىڭ قۇزىرەتتى ورگاندارى وقيعانىڭ ءمان-جايىن انىقتاپ جاتىر. قازاقستاندىق ديپلوماتتار مارقۇمنىڭ جاقىندارىمەن بايلانىستا وتىر جانە قاجەتتى كونسۋلدىق-قۇقىقتىق كومەك كورسەتىپ جاتىر»، - دەپ حابارلادى قر ءسىم ءباسپاسوز قىزمەتى.
