«قازتەمىرترانس» اق-نىڭ بۇرىنعى ۆيتسە-پرەزيدەنتى، سونداي-اق ۇقك ەكس-توراعاسى كارىم ءماسىموۆتىڭ بۇرىنعى كۇيەۋ بالاسى رەتىندە تانىلعان ازامات قاپەنوۆ رەسەيدە سىرتتاي قاماۋعا الىندى. بۇل تۋرالى تاسس اگەنتتىگى جازدى، دەپ حابارلايدى “ادىرنا”.
باسىلىمنىڭ مالىمەتىنشە، وعان «ازيا اۆتو – بيپەك» كومپانيالار توبىنىڭ بۇرىنعى يەسى اناتولي بالۋشكينگە قاتىستى ءىس اياسىندا ايىپ تاعىلعان.
«ەكى اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسىن سانكتسيالاندى. قاماۋ مەرزىمى ولاردىڭ ناقتى ۇستالعان كۇنىنەن باستاپ، ال رەسەي فەدەراتسياسىنا ەكستراديتسيالانعان نەمەسە دەپورتاتسيالانعان جاعدايدا رەسەيدىڭ قۇقىق قورعاۋ ورگاندارىنا تاپسىرىلعان ساتتەن باستاپ ەسەپتەلەدى»، - دەلىنگەن اعايىندى ازامات جانە مەدەر قاپەنوۆتەرگە قاتىستى ءىس ماتەريالدارىندا.
تەرگەۋ نۇسقاسى بويىنشا، اعايىندى قاپەنوۆتەر قازاقستاندا تىركەلگەن «پتد» جشس-دەگى 25 پايىزدىق ۇلەستى زاڭسىز يەمدەندى دەگەن كۇدىككە ىلىنگەن. قۇجاتتارعا سايكەس، ولار كومپانيا قىزمەتىنە قاتىستى داۋلاردى شەشۋگە كومەكتەسەمىز دەپ كاسىپكەر اناتولي بالۋشكيندى ءوز ارەكەتتەرىنىڭ زاڭدىلىعىنا سەندىرگەن. الايدا تەرگەۋ ولاردىڭ باستاپقىدا العان مىندەتتەمەلەرىن ورىنداۋدى كوزدەمەگەنىن ايتادى.
ءىس بويىنشا كەلتىرىلگەن ماتەريالدىق شىعىن كولەمى شامامەن 52 ملن رۋبل دەپ باعالانعان.
حابارلامادا اناتولي بالۋشكيننىڭ قازاقستانداعى «ازيا اۆتو – بيپەك» كومپانيالار توبىنىڭ نەگىزگى اكتسيونەرى بولعانى ايتىلعان. كومپانيا قىزمەتىن كەڭەيتۋ ءۇشىن ول سول كەزدەگى «تسەسنابانكتەن» (قازىرگى Jusan Bank) 66 ملرد تەڭگە كولەمىندە نەسيە العان. كەيىن بانك قارىزدى ءوندىرىپ الۋ ءۇشىن سوتقا جۇگىنىپ، سوت بالۋشكين مەن ونىڭ سەرىكتەسى ەرىك ساعىمباەۆتىڭ نەسيە قاراجاتىن جىمقىرعانىن انىقتاعان. سونىڭ سالدارىنان كاسىپكەردىڭ اكتيۆتەرىنە تىيىم سالىنىپ، كومپانيالار توبىنىڭ جۇمىسى توقىراعان.
ازامات قاپەنوۆ قازاقستاندا دا ىزدەۋدە ءجۇر. وعان قاتىستى سىرتتاي قاماۋعا الۋ تۋرالى شەشىم شىعارىلعان.
ەسكە سالساق، 2025 جىلدىڭ ساۋىرىندە قازاقستان سوتى اسا ءىرى كولەمدەگى الاياقتىق پەن سالىق تولەۋدەن جالتارۋ ءىسى بويىنشا «ازيا اۆتونىڭ» بۇرىنعى توپ-مەنەدجەرلەرى اناتولي بالۋشكيندى 9 جىلعا، ال ەرىك ساعىمباەۆتى 8 جىل 6 ايعا باس بوستاندىعىنان ايىرعان بولاتىن. الايدا قازىر ەكەۋى دە رەسەي اۋماعىندا ءجۇر جانە رەسەي تاراپى ولاردى قازاقستانعا ەكستراديتسيالاماي وتىر.
