ارمەنيانىڭ بۇرىنعى قورعانىس ءمينيسترى ۆيگەن ساركيسيان سىرتتاي قاماۋعا الىنىپ، حالىقارالىق ىزدەۋگە جاريالاندى. بۇل تۋرالى ارمياندىق بۇقارالىق اقپارات قۇرالدارىنا سىلتەمە جاساعان Caliber.Az جازدى، دەپ حابارلايدى “ادىرنا”.
مالىمەتكە سايكەس، ساركيسيان ەرەۆانداعى بريۋسوۆ اتىنداعى مەملەكەتتىك ۋنيۆەرسيتەتتىڭ مۇلكىن زاڭسىز يەلىكتەن شىعارۋ ءىسى بويىنشا تەرگەۋگە تارتىلىپ وتىر.
اتالعان قىلمىستىق ءىس اياسىندا بۇعان دەيىن بىرنەشە بۇرىنعى جوعارى لاۋازىمدى شەنەۋنىك قاماۋعا الىنعان. ولاردىڭ قاتارىندا ارمەنيانىڭ بۇرىنعى ءبىلىم جانە عىلىم ءمينيسترى، رەسپۋبليكالىق پارتيا توراعاسىنىڭ ورىنباسارى ارمەن اشوتيان دا بار.
تەرگەۋ ورگاندارى كۇدىكتىلەرگە قىزمەتتىك وكىلەتتىكتەرىن اسىرا پايدالانۋ جانە شامامەن 500 مىڭ اقش دوللارىن زاڭداستىرۋ (اقشانى جىلىستاتۋ) باپتارى بويىنشا ايىپ تاعىپ وتىر.
ازىرگە ۆيگەن ساركيسياننىڭ ناقتى قاي ەلدە جۇرگەنى تۋرالى رەسمي اقپارات جاريالانعان جوق. تەرگەۋ امالدارى جالعاسۋدا.
