ەلىمىزدە عالىمدار قۇقىعى جونىندەگى ومبۋدسمەن ينستيتۋتى قۇرىلادى. بۇل تۋرالى ءماجىلىس دەپۋتاتى اسحات ايماعامبەتوۆ الەۋمەتتىك جەلىدەگى پاراقشاسىندا جازدى، دەپ حابارلايدى “ادىرنا”.
ء“بىز ۇسىنعان تۇزەتۋلەر زاڭ بولىپ بەكىتىلدى. ەندى قازاقستاندا العاش رەت زاڭ جۇزىندە عالىمداردىڭ قۇقىعى مەن اكادەميالىق بوستاندىعى تۋرالى ناقتى كەپىلدىكتەر بەرەتىن نورمالار پايدا بولدى. بۇعان قوسا، ارنايى جاڭا ينستيتۋت – عالىمدار قۇقىعى جونىندەگى ومبۋدسمەن ينستيتۋتى ەنگىزىلەدى، - دەپ جازدى ايماعامبەتوۆ.
دەپۋتات بۇل وزگەرىستەر ناقتى نە بەرەتىنىن ءتۇسىندىردى.
«بىرىنشىدەن، زاڭ جۇزىندە اكادەميالىق بوستاندىق كەپىلدەندىرىلەدى. ەندى ءاربىر عالىمنىڭ زەرتتەۋ باعىتىن ءوز قالاۋىمەن ەركىن تاڭداۋعا، سىرتقى قىسىمسىز ءوزىنىڭ عىلىمي پىكىرىن اشىق بىلدىرۋگە جانە حالىقارالىق عىلىمي قاۋىمداستىقتارعا ەمىن-ەركىن مۇشە بولۋعا تولىق قۇقىعى زاڭدا جازىلدى. ەكىنشىدەن، عالىمدار قۇقىعى جونىندەگى ومبۋدسمەن ينستيتۋتى قۇرىلادى. ونى ءبىز ۇلتتىق عىلىم اكادەمياسىنىڭ جانىنان اشىلسىن دەپ ۇسىندىق. بۇل ۋاكىلەتتى تۇلعا ەندى عالىمدار مەن عىلىمي قىزمەتكەرلەردىڭ قۇقىقتارىن تىكەلەي قورعايتىن بولادى»، - دەدى ول.
ول ومبۋدسمەن ناقتى نەمەن اينالىساتىنىن ءتىزىپ بەردى. اتاپ ايتقاندا:
• عالىمدار مەن عىلىمي قىزمەتكەرلەردىڭ قۇقىقتارىنىڭ بۇزىلۋىنا قاتىستى وتىنىشتەر مەن شاعىمداردى تىكەلەي قارايدى.
• عالىمداردىڭ قۇقىقتارى مەن زاڭدى مۇددەلەرىن قورعاۋ بويىنشا كونسۋلتاتسيالىق كومەك بەرەدى.
• مەملەكەتتىك ورگاندارمەن، ءبىلىم جانە عىلىم ۇيىمدارىمەن عالىمداردىڭ مۇددەسىن قورعاۋ ءۇشىن تىكەلەي ءوزارا ءىس-قيمىل جاسايدى.
• عالىمداردىڭ قۇقىقتارىن قورعاۋدى جاقسارتۋ ماقساتىندا عىلىم جانە تەحنولوگيالىق ساياسات جونىندەگى زاڭنامانى جەتىلدىرۋگە بايلانىستى ۇلتتىق اكادەمياعا جانە ۋاكىلەتتى ورگانعا ۇسىنىستار ەنگىزەدى.
“مەملەكەت باسشىسى قاسىم-جومارت توقاەۆ عىلىمدى ارقاشان قولدايدى. جاڭا زاڭنامالىق ساياساتتا بۇل — باستى باسىمدىق”، — دەپ تۇيىندەدى اسحات ايماعامبەتوۆ.
