Elımızde Ǧalymdar qūqyǧy jönındegı ombudsmen instituty qūrylady. Būl turaly Mäjılıs deputaty Ashat Aimaǧambetov äleumettık jelıdegı paraqşasynda jazdy, dep habarlaidy “Adyrna”.
“Bız ūsynǧan tüzetuler zaŋ bolyp bekıtıldı. Endı Qazaqstanda alǧaş ret zaŋ jüzınde ǧalymdardyŋ qūqyǧy men akademiialyq bostandyǧy turaly naqty kepıldıkter beretın normalar paida boldy. Būǧan qosa, arnaiy jaŋa institut – Ǧalymdar qūqyǧy jönındegı ombudsmen instituty engızıledı, - dep jazdy Aimaǧambetov.
Deputat būl özgerıster naqty ne beretının tüsındırdı.
«Bırınşıden, zaŋ jüzınde akademiialyq bostandyq kepıldendırıledı. Endı ärbır ǧalymnyŋ zertteu baǧytyn öz qalauymen erkın taŋdauǧa, syrtqy qysymsyz özınıŋ ǧylymi pıkırın aşyq bıldıruge jäne halyqaralyq ǧylymi qauymdastyqtarǧa emın-erkın müşe boluǧa tolyq qūqyǧy zaŋda jazyldy. Ekınşıden, Ǧalymdar qūqyǧy jönındegı ombudsmen instituty qūrylady. Ony bız Ūlttyq ǧylym akademiiasynyŋ janynan aşylsyn dep ūsyndyq. Būl uäkılettı tūlǧa endı ǧalymdar men ǧylymi qyzmetkerlerdıŋ qūqyqtaryn tıkelei qorǧaityn bolady», - dedı ol.
Ol Ombudsmen naqty nemen ainalysatynyn tızıp berdı. Atap aitqanda:
• Ǧalymdar men ǧylymi qyzmetkerlerdıŋ qūqyqtarynyŋ būzyluyna qatysty ötınışter men şaǧymdardy tıkelei qaraidy.
• Ǧalymdardyŋ qūqyqtary men zaŋdy müddelerın qorǧau boiynşa konsultasiialyq kömek beredı.
• Memlekettık organdarmen, bılım jäne ǧylym ūiymdarymen ǧalymdardyŋ müddesın qorǧau üşın tıkelei özara ıs-qimyl jasaidy.
• Ǧalymdardyŋ qūqyqtaryn qorǧaudy jaqsartu maqsatynda ǧylym jäne tehnologiialyq saiasat jönındegı zaŋnamany jetıldıruge bailanysty Ūlttyq akademiiaǧa jäne uäkılettı organǧa ūsynystar engızedı.
“Memleket basşysy Qasym-Jomart Toqaev ǧylymdy ärqaşan qoldaidy. Jaŋa zaŋnamalyq saiasatta būl — basty basymdyq”, — dep tüiındedı Ashat Aimaǧambetov.
