15 ماۋسىمدا ەۋروپالىق وداق ۋكراينا مەن مولدوۆانى ەو قۇرامىنا قابىلداۋ جونىندەگى رەسمي كەلىسسوزدەردىڭ العاشقى كەزەڭىن باستايدى، دەپ حابارلايدى “ادىرنا” ۇلتتىق پورتالى.
DW دەرەگىنشە، بۇل تۋرالى ەۋروپالىق كوميسسيانىڭ ءتورايىمى ۋرسۋلا فون دەر ليايەن مەن ەۋروپالىق كەڭەستىڭ توراعاسى انتونيۋ كوشتا مالىمدەدى.
ولاردىڭ ايتۋىنشا، ەو-عا مۇشە بارلىق 27 مەملەكەت ۋكراينا مەن مولدوۆامەن كەلىسسوزدەردىڭ العاشقى بلوگىن اشۋعا كەلىسكەن. ەۋروپالىق ساياساتكەرلەر بۇل شەشىمدى ەكى ەلدىڭ رەفورمالاردى جۇزەگە اسىرۋداعى تاباندىلىعى مەن باتىلدىعىنا بەرىلگەن باعا دەپ اتادى.
«بۇل قادام ۋكراينا مەن مولدوۆانىڭ قيىن جاعدايلارعا قاراماستان جۇرگىزگەن رەفورمالارىنا دەگەن قۇرمەتتىڭ بەلگىسى»، – دەلىنگەن مالىمدەمەدە.
ەو باسشىلىعى وداقتىڭ كەڭەيۋىن قازىرگى گەوساياسي جاعدايدا ماڭىزدى ستراتەگيالىق شەشىم رەتىندە باعالاپ وتىر. سونىمەن قاتار، ۆەنگريانىڭ قارسىلىعى الىنعاننان كەيىن ەۋرووداق ەلدەرى العاشقى كەلىسسوزدەر كلاستەرى بويىنشا ورتاق ۇستانىمعا كەلگەنى حابارلاندى.
كەلىسسوزدەردىڭ ءبىرىنشى كەزەڭى دەموكراتيا، زاڭ ۇستەمدىگى، ادام قۇقىقتارى جانە نەگىزگى ەۋروپالىق قۇندىلىقتارعا ارنالادى. جالپى العاندا، مۇشەلىككە قابىلداۋ ۇدەرىسى التى كلاستەردەن تۇرادى جانە ونداعان باعىتتى قامتيدى.
كەلىسسوزدەر تولىق اياقتالعاننان كەيىن ۋكراينا مەن مولدوۆانىڭ ەۋروپالىق وداققا قوسىلۋىن بارلىق 27 مۇشە مەملەكەت بەكىتىپ، راتيفيكاتسيالاۋى ءتيىس.
