استانادا «ادىلەت» پارتياسىنىڭ II سەزى ءوز جۇمىسىن باستادى. سەزد جۇمىسىنا پارتيا دەلەگاتتارى، قوعامدىق جانە كاسىبي بىرلەستىكتەردىڭ وكىلدەرى قاتىسۋدا.
ءىس-شاراعا قۇرىلىس، دەنساۋلىق ساقتاۋ، ءبىلىم بەرۋ، كولىك، تەلەكوممۋنيكاتسيا، تۋريزم، كاسىپكەرلىك، ەنەرگەتيكا، تسيفرلىق تەحنولوگيالار جانە مۇناي-سەرۆيس سالاسىن ۇسىناتىن ءىرى سالالىق بىرلەستىكتەردىڭ، كاسىبي قاۋىمداستىقتاردىڭ جانە ساراپشىلىق ۇيىمداردىڭ جەتەكشىلەرى قاتىسۋدا. ولار پارتيا قاتارىنا ءوتىپ، بۇگىندە ونىڭ ۇيىمدىق الەۋەتىن نىعايتۋعا جانە باعدارلامالىق ماقساتتارىن جۇزەگە اسىرۋعا اتسالىسۋدا. سونىڭ ىشىندە «PARYZ» جۇمىس بەرۋشىلەردىڭ ۇلتتىق كونفەدەراتسياسى، قازاقستاننىڭ ازاماتتىق اليانسى، قازاقستاننىڭ مۇناي سەرۆيستىك كومپانيالار وداعى، قازاقستان ينۆەستورلارى قاۋىمداستىعى، قازاقستان بايلانىس وپەراتورلارى قاۋىمداستىعى، قازاقستان اۆتوموبيل وداعى جانە باسقا دا ۇيىمدار بار.
سەزد جۇمىسىنا «AMANAT» پارتياسىنىڭ وكىلدەرى دە قاتىسۋدا. اتالعان پارتيانىڭ «ادىلەت» پارتياسىنا قوسىلۋى ماسەلەسى سەزد دەلەگاتتارىنىڭ قاراۋىنا شىعارىلدى. سونىمەن قاتار II سەزدىڭ كۇن تارتىبىنە پارتيانىڭ ودان ءارى دامۋى، وڭىرلىك فيليالداردى قۇرۋ جانە ۇيىمدىق قۇرىلىمدى نىعايتۋ ماسەلەلەرى ەنگىزىلدى.
سەزد قارساڭىندا ستراتەگيالىق سەسسيا ۇيىمداستىرىلىپ، دەلەگاتتار پارتيانىڭ الداعى كەزەڭدەگى باسىم باعىتتارىن تالقىلادى.
«ادىلەت» پارتياسى ءتۇرلى كاسىبي قاۋىمداستىقتار مەن قوعامدىق بىرلەستىكتەر وكىلدەرىنىڭ باستاماسىمەن قۇرىلدى. پارتيانىڭ قالىپتاسۋى 2026 جىلعى 15 ناۋرىزدا قابىلدانعان قازاقستان رەسپۋبليكاسىنىڭ جاڭا كونستيتۋتسياسىنان كەيىن باستالعان ساياسي جاڭعىرۋ كەزەڭىمەن تۇسپا-تۇس كەلدى.
2026 جىلعى 7 مامىردا استانادا «ادىلەت» ساياسي پارتياسىنىڭ قۇرىلتاي سەزى ءوتىپ، پارتيانىڭ رەسمي قىزمەتى باستالدى. ال 2026 جىلعى 1 ماۋسىمدا قازاقستان رەسپۋبليكاسىنىڭ زاڭناماسىنا سايكەس قازاقستان رەسپۋبليكاسى ادىلەت مينيسترلىگى «ادىلەت» ساياسي پارتياسىن مەملەكەتتىك تىركەۋدەن وتكىزدى.
پارتيا ەڭبەك ادامدارىنىڭ، مۇناي-سەرۆيس جانە تاۋ-كەن مەتاللۋرگياسى سالاسى قىزمەتكەرلەرىنىڭ، شاحتەرلەردىڭ، سپورت، ءبىلىم بەرۋ، دەنساۋلىق ساقتاۋ، عىلىم، كاسىپكەرلىك، IT-سەكتور، قۇقىق سالاسى جانە كرەاتيۆتى يندۋستريا وكىلدەرىنىڭ باسىن بىرىكتىرەدى.
پارتيا پلاتفورماسىنىڭ نەگىزىن ادىلەتتىلىك، جاۋاپكەرشىلىك، تەڭدىك، وتانسۇيگىشتىك جانە پروگرەسس قاعيداتتارى قۇرايدى. پارتيا زاڭ ۇستەمدىگىن نىعايتۋدى، ءتيىمدى مەملەكەتتىك جانە قوعامدىق ينستيتۋتتاردى دامىتۋدى، وڭىرلەردى قولداۋدى، ادامي كاپيتالدى جەتىلدىرۋدى، تسيفرلاندىرۋدى ىلگەرىلەتۋدى جانە باسەكەگە قابىلەتتى ەكونوميكانى قالىپتاستىرۋدى قولدايدى.
«ادىلەت» پارتياسىنىڭ II سەزى ءوز جۇمىسىن جالعاستىرۋدا.
