جەتىسۋ وبلىسىندا يادرولىق ماتەريالدارمەن زاڭسىز اينالىسىپ، ولاردى قازاقستان اۋماعىنان كونتراباندالىق جولمەن شىعارۋعا ارەكەتتەنگەن التى ادامعا قاتىستى سوت ۇكىمى جاريالاندى، دەپ حابارلايدى "ادىرنا" ۇلتتىق پورتالى.
پانفيلوۆ اۋداندىق سوتىنىڭ مالىمەتىنشە، ايىپتالۋشىلار يادرولىق ماتەريالداردى زاڭسىز ساقتاۋ، تاسىمالداۋ جانە وتكىزۋ، كونترابانداعا وقتالۋ، قىزمەتتىك بابىن پايدالانا وتىرىپ جىمقىرۋ باپتارى بويىنشا جاۋاپقا تارتىلعان. تەرگەۋ بارىسىندا انىقتالعانداي، كۇدىكتىلەر الدىن الا ءسوز بايلاسىپ، ۋران كونتسەنتراتىن زاڭسىز يەمدەنىپ، ونى قىتايعا شىعارۋدىڭ سحەماسىن ۇيىمداستىرعان. ولار ماتەريالداردى ءوندىرىس ورنىنان جاسىرىن الىپ شىعىپ، ساقتاپ، بىرنەشە ادام ارقىلى تاسىمالداپ، مەملەكەتتىك شەكارادان وتكىزۋدى كوزدەگەن.
الايدا زاڭسىز ارەكەت «نۇر جولى» وتكىزۋ پۋنكتىندە توقتاتىلدى. شەكارالىق باقىلاۋ كەزىندە راديواكتيۆتى زات انىقتالىپ، جۇرگىزىلگەن ساراپتاما ونىڭ ۋران كونتسەنتراتى ەكەنىن جانە راديواكتيۆتىلىك دەڭگەيى بەلگىلەنگەن نورمادان بىرنەشە ەسە جوعارى بولعانىن كورسەتتى.
سوت شەشىمىمەن ءۇش ادام كىنالى دەپ تانىلىپ، ارقايسىسى 7 جىل 6 ايعا باس بوستاندىعىنان ايىرىلدى. تاعى ەكى سوتتالۋشى 2 جىل 6 ايعا، ال ءبىر ايىپتالۋشى 4 جىل 6 اي مەرزىمگە سوتتالدى. بارلىق سوتتالعاندار جازالارىن ورتاشا قاۋىپسىزدىك دەڭگەيىندەگى قىلمىستىق-اتقارۋ جۇيەسى مەكەمەلەرىندە وتەيتىن بولادى.
قازىرگى ۋاقىتتا سوت ۇكىمى زاڭدى كۇشىنە ەنگەن جوق.
