وزبەكستان پرەزيدەنتى شاۆكات ميرزيوەۆ پەن گەرمانيانىڭ فەدەرالدىق پرەزيدەنتى فرانك-ۆالتەر شتاينمايەر تاشكەنتتە Volkswagen اۆتوكولىكتەرىن ءىرى توراپتىق قۇراستىرۋ ادىسىمەن ءوندىرۋدى ىسكە قوستى. بۇل تۋرالى وزبەكستان باسشىسىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
اۆتوزاۋىتتان بولەك، ءاندىجان وبلىسىندا لوگيستيكالىق ورتالىقتىڭ قۇرىلىسى، سۇيىق تۇرمىستىق جۋ قۇرالدارىن ءوندىرۋ، تەمىرجول سالاسىنا ماماندار دايارلاۋ جانە زاماناۋي ەمتيحان ورتالىقتارىن اشۋ جوبالارى دا ىسكە قوسىلعان.
جوبالار ەكى ەلدىڭ رەسمي دەلەگاتسيالارى قاتىسقان شاعىن جانە كەڭەيتىلگەن قۇرامداعى جوعارى دەڭگەيدەگى كەلىسسوزدەر بارىسىندا باستالعان. تاراپتار وزبەكستان مەن گەرمانيا اراسىنداعى ىنتىماقتاستىقتى ودان ءارى دامىتۋ، ساياسي ديالوگتى نىعايتۋ جانە ساۋدا-ەكونوميكالىق بايلانىستاردى كەڭەيتۋ ماسەلەلەرىن تالقىلاعان. ميرزيوەۆ شتاينمايەردىڭ ەۋرووداق پەن ورتالىق ازيا ەلدەرى اراسىنداعى قاتىناستاردى دامىتۋعا قوسقان جەكە ۇلەسىن ەرەكشە اتاپ ءوتتى.
كەلىسسوزدەردىڭ نەگىزگى تاقىرىبى ساۋدا-ينۆەستيتسيالىق ىنتىماقتاستىق بولدى. وتكەن جىلى ەكى ەل اراسىنداعى تاۋار اينالىمى 1,4 ملرد دوللاردان استى، ال بيىلعى جىلدىڭ باسىنان بەرى تاعى 5%-عا وسكەن. 2025 جىلى گەرمانيانىڭ وزبەكستان ەكونوميكاسىنا سالعان ينۆەستيتسيا كولەمى 2 ملرد دوللارعا جەتتى. مامىر ايىندا تاشكەنتتە وتكەن گەرمانيا ەكونوميكاسى كۇندەرى مەن گەرمانيا–وزبەكستان ىسكەرلىك كەڭەسىنىڭ 10-وتىرىسىندا 1 ملرد دوللاردان استام ينۆەستيتسيالىق جانە ساۋدا كەلىسىمدەرى جاسالدى.
پرەزيدەنتتەر ونەركاسىپ، ەنەرگەتيكا جانە «جاسىل» ەكونوميكا، كولىك جانە لوگيستيكا، تاۋ-كەن جانە توقىما سالالارى، فارماتسەۆتيكا، اۋىل شارۋاشىلىعى، ءبىلىم جانە دەنساۋلىق ساقتاۋ باعىتتارىنداعى ىنتىماقتاستىقتى كەڭەيتۋ جوسپارلارىن راستادى.
كەلىسسوزدەر قورىتىندىسى بويىنشا ميرزيوەۆ پەن شتاينمايەر بىرلەسكەن مالىمدەمەگە قول قويىپ، وزبەكستانداعى تۇراقتى قالالىق دامۋعا ارنالعان جوبالاردى جۇزەگە اسىرۋ ءۇشىن گرانتتىق جانە جەڭىلدەتىلگەن قارجىلاندىرۋ تۋرالى كەلىسىمدەر جاسالدى. كەيىن ەكى ەل پرەزيدەنتتەرى «كۋكساروي» رەزيدەنتسياسىنداعى قۇرمەتتى قوناقتار اللەياسىندا اعاش وتىرعىزدى.
Volkswagen مەن «ۋزاۆتوسانوات» كومپانياسىنىڭ ەنشىلەس ۇيىمى Alyans Auto اراسىندا اۆتوكولىكتەردى ءىرى توراپتىق قۇراستىرۋدى باستاۋ تۋرالى كەلىسىم تاشكەنت حالىقارالىق ينۆەستيتسيالىق فورۋمى اياسىندا جاسالعان. قۇراستىرۋ قىتايدان جەتكىزىلەتىن بولشەكتەر نەگىزىندە جۇرگىزىلەدى، ال لوگيستيكالىق جاقىندىق نارىقتى ءتيىمدى قامتۋعا جانە كومىرتەك ءىزىن ازايتۋعا مۇمكىندىك بەرەدى. «ۋزاۆتوسانوات» باسقارما توراعاسى ۋلۋگبەك روزۋكۋلوۆتىڭ ايتۋىنشا، نەمىس ماركاسىنىڭ جەتى مودەلى شىعارىلادى. كولىكتەر تەك وزبەكستان ىشكى نارىعىنا عانا ەمەس، تمد ەلدەرىنە، ورتالىق ازياعا جانە كاۆكازعا دا جەتكىزىلەدى.
Volkswagen بۇرىن دا وزبەكستان نارىعىندا بولعان. 2020 جىلى «ۋزاۆتوسانوات» پەن Volkswagen Group Rus دجيزاقتاعى اۆتوزاۋىت بازاسىندا Caddy جەڭىل كوممەرتسيالىق كولىكتەرىن شىعارۋ تۋرالى كەلىسىم جاساعان. سول جىلى Volkswagen كولىكتەرىنىڭ ساتىلىمى باستالىپ، كەيىن Škoda برەندىنىڭ دە ساتىلىمى جولعا قويىلعان. الايدا 2023 جىلى Volkswagen رەسەيدەگى بيزنەسىن «اۆيلون» ديلەرىنە ساتقان.
