التىن ءوندىرۋشى «التىنالماس» كومپانياسى «مايقايىڭالتىن» كاسىپورنىنداعى 100 پايىز اكتسياسىن ءوزىنىڭ باس كومپانياسى – نيدەرلاندتا تىركەلگەن Gouden Reserves B.V. قۇرامىنداعى Gouden Reserves Kazakhstan ۇيىمىنا ساتتى، دەپ حابارلايدى "ادىرنا" ۇلتتىق پورتالى.
كومپانيانىڭ مالىمەتىنشە، مامىلە قۇنى 8,7 ميلليارد تەڭگەنى قۇرادى. ساتىپ الۋ-ساتۋ كەلىسىمشارتى 2026 جىلعى 27 ساۋىردە راسىمدەلگەن.
«مايقايىڭالتىن» پاۆلودار وبلىسىنداعى مايقايىڭ جەراستى كەنىشىنە، كەن بايىتۋ كەشەنىنە، ورتالىق قازاندىققا جانە كولىك تسەحىنا يەلىك ەتەدى. سونىمەن قاتار كاسىپورىننىڭ ورتالىق قازاندىعى وندىرىستىك نىسانداردى عانا ەمەس، شامامەن 10 مىڭ تۇرعىنى بار مايقايىڭ كەنتىن دە جىلۋمەن قامتاماسىز ەتەدى. كومپانيا التىن قۇرامدى كەن وندىرۋمەن اينالىسادى جانە بۇعان دەيىن 2026 جىلى ءوندىرىس كولەمىن 500 مىڭ تونناعا دەيىن ۇلعايتۋدى جوسپارلاعان بولاتىن.
بۇعان دەيىن جاريالانعان مالىمەتتەرگە سايكەس، «التىنالماس» اكتسيالارىنىڭ نەگىزگى بولىگى نيدەرلاندتىق Gouden Reserves B.V.-عا تيەسىلى بولعان. سونىمەن قاتار 2026 جىلدىڭ ناۋرىزىندا Integra Construction KZ قۇرىلىس توبىنىڭ يەسى، قازاقستاندىق كاسىپكەر شاحمۇرات ءمۇتالىپ «اك التىنالماس» كومپانياسىنىڭ 100 پايىز اكتسياسىن ساتىپ الۋ تۋرالى كەلىسىمگە قول قويعانى بەلگىلى بولعان ەدى.
سونداي-اق كومپانيانىڭ 2025 جىلعا ارنالعان ەسەبىندە «انيسيموۆ كليۋچ» جانە «مايقايىڭالتىن» اكتيۆتەرىن باس كومپانيانىڭ قاراماعىنا وتكىزۋ جوسپارلانعانى كورسەتىلگەن. ساراپشىلاردىڭ پىكىرىنشە، بۇل قادام «التىنالماس» كومپانياسىن جاڭا ينۆەستورعا ساتۋ مامىلەسىنىڭ ءبىر بولىگى بولۋى مۇمكىن.
ايتا كەتەيىك، بۇعان دەيىن 2024 جىلدىڭ 4 قاڭتارىندا پاۆلودار وبلىسىندا “رتسش پۆاسس” جشس-ءنىڭ قۇتقارۋشىلار مىنگەن اۆتوبۋسى جەر استىنداعى ويىققا قۇلاپ، ءتورت ادام قازا تاپقان ەدى.
