14 ماۋسىمدا قازاقستان پرەمەر ليگاسىنىڭ 13-تۋرى اياسىندا اقتوبە مەن وسكەمەندىك التاي اراسىندا ويىن ءوتتى. اقتوبەلىك جانكۇيەرلەر ءۇشىن بۇل كەزەكتى تۋر ەمەس، فۋتبول مەرەكەسى بولدى.
تۋرنيرلىك كەستەدەگى جاعدايدى جاقسارتۋ ءارى قوبىلاندى باتىر ستاديونىن لىق تولتىرعان جانكۇيەرلەردىڭ ءۇمىتىن اقتاۋ ءۇشىن ءوز الاڭىندا ۇپايدى جىبەرمەۋ «اقتوبەنىڭ» باستى مىندەتى ەدى. ويىندى ءساتتى وتكىزۋ سىرت الاڭدا ويىن وتكىزەتىن شىعىستىق كوماندا ءۇشىن دە ماڭىزدى بولدى، ويتكەنى ءار ۇپاي ولاردىڭ تۋرنيرلىك كەستەدەگى ورنى مەن پرەمەر ليگاداعى بولاشاعىن شەشەدى.
جانكۇيەرلەردىڭ سەنىمى
تۋرنيرلىك كەستەدە 7-ورىندى يەلەنگەن اقتوبە ءوز ۇيىندە 14-ورىندا تۇرعان التايدى قابىلدادى. ماتچتى تاماشالاۋعا 11 000 ادام جينالىپ، باسىم كوپشىلىگى اقتوبەلىك كوماندانىڭ جەڭىسىنە سەنىمدى بولدى.
ء“بىز جەڭىستە دە، جەڭىلىستە دە اقتوبەمەن بىرگەمىز! بۇگىنگى ويىندا اق-قىزىللاردىڭ جەڭەتىنىنە نىق سەنىمدى بولدىم,”- دەيدى 13-سەكتورداعى جانكۇيەرلەردىڭ ءبىر بولىگى.
ماتچ بارىسىندا “و، اقتوبە، سەن كوپ جاسا!” دەپ اندەتكەن “13 سەكتور” ويىننىڭ سوڭىندا دا ويىنشىلارعا العىس پەن قولداۋ ءبىلدىردى.
ويىن بارىسى
العاشقى 45 مينۋت كۇرەسكە تولى بولعانىمەن تابلودا ەسەپ اشىلمادى. دەگەنمەن قوبىلاندىنى تولتىرعان جانكۇيەرلەردىڭ ءۇمىتى كەلەسى تايمدا الاڭعا شىعاتىن ويىنشىلاردا ەدى. ەكىنشى تايم مۇلدەم بولەك ستسەناريمەن ءوربىدى. باپكەرلەر قۇرامىنىڭ جاساعان اۋىسىمدارى ويىننىڭ قارقىنىن تۇبەگەيلى وزگەرتتى. «اقتوبە» قىسىمدى ۇدەتىپ، قارسىلاستىڭ قورعانىس شەبىن ەكى رەت بۇزىپ ءوتتى. وسىلايشا، 57 مينۋتتا ۆيتالي لاتۋرنۋس ەسەپ اشسا، 71 مينۋتتا يۆان وردەتس ەسەپتى ەسەلەدى.
جاس تالانتتىڭ جارقىراۋى
17 جاستاعى اقتوبەلىك ۆيتالي لاتۋرنۋس التايمەن وتكەن ماتچتا ءوزىنىڭ ءتورتىنشى گولىن سالىپ، ماتچتىڭ عانا ەمەس، كوماندانىڭ قاھارمانىنا اينالدى. 55-مينۋتتا باپكەردىڭ شەشىمىمەن الاڭعا شىققان ول 2 مينۋتتان سوڭ گول اۆتورى اتاندى. جانكۇيەرلەدىڭ ىقىلاسىنا بولەنگەن “التىن بالاعا” ويىن سوڭىندا كوماندا ءۇشىن وتە ماڭىزدى زيگا-زاگا ايتۋ بۇيىردى. 
«قايراتتان» كەلگەن جاڭا كۇش
82-مينۋتتا “قايرات” ساپىنان جاقىندا عانا كەلگەن گيورگي زاريا الاڭعا شىقتى. دەبيۋتتىك ويىندا ءوز دەڭگەيىن كورسەتەدى بىلگەن فۋتبولشىعا جانكۇيەرلەردىڭ سەنىمى دە مول بولدى.
ويىن سوڭىنداعى لايىقتى جەڭىس
ويىن سوڭىندا جارتىلاي قورعاۋشى گەورگي جۋكوۆ “اقتوبە” فۋتبول كلۋبىنىڭ الەۋمەتتىك جەلىدەگى پاراقشاسىندا ويىن جايلى قىسقاشا پىكىرىن ءبىلدىردى:
“مەنىڭ ويىمشا، بۇگىن ءبىز لايىقتى تۇردە جەڭىسكە جەتتىك. ويىن باسىنان ۇلكەن قارقىنمەن ويلادىق. بۇگىن جاي عانا جەڭىس بولمادى، بۇگىن شىنىمەن مىقتى بولدىق. كوماندا رەتىندە جاقسى دايىندالدىق ءارى جاڭا ويىنشىلاردىڭ كەلۋى مەن حالىقارالىق ۇزىلىستەر دە بىزگە جاقسى اسەر ەتتى”.
“بۇل ويىن تەك ويىنشىلار ءۇشىن عانا ەمەس، بۇكىل كوماندا جانە جانكۇيەرلەر ءۇشىن دە وتە ماڭىزدى بولدى. بىراق مەن ءۇشىن بۇگىن جەڭىستەن دە ماڭىزدىسى ويىنشىلارىمىزدىڭ قازىرگى كەزدە وزدەرىنە كورسەتىلىپ جاتقان قىسىمعا قالاي جاۋاپ بەرگەنى. مەنىڭشە، بۇل – اۋقىمدى جەڭىستەرگە باستايتىن العاشقى قادام,”- دەدى باس باپكەر شتەفان تاركوۆيچ پرەسس-كونفەرەنتسيادا.
ەسكە سالا كەتسەك، كەزەكتى تۋر قورىتىندىسى بويىنشا اقتوبە 19 ۇپايمەن 7-ورىنىن ساقتاسا، التاي 9 ۇپايمەن 15-ورىنعا تابان تىرەدى. قوبىلاندى باتىر ستاديونىنداعى كەلەسى ماتچ ماۋسىمنىڭ 21-ءى استانامەن وتەدى، ال وسكەمەندىك التاي كلۋبى كەلەسى ويىنىن 20 ماۋسىم ءوز الاڭىندا جەتىسۋعا قارسى وتكىزبەك.
اقتورعىن ساعىزعاليەۆا
