ۋكراينانىڭ پولتاۆا وبلىسىنداعى بيلسك قالاشىعى ماڭىنداعى سكوروبير قورىمىندا ارحەولوگتار ساق داۋىرىنە جاتاتىن ايەل قابىرىنەن جاقسى ساقتالعان بىلعارى باس كيىم مەن قولا پلاستينالارمەن بەزەندىرىلگەن بەلدىكتى تاپتى، دەپ حابارلايدى "ادىرنا" ۇلتتىق پورتالى.
ARTS جۋرنالىنىڭ مالىمەتىنشە، بۇل جادىگەرلەر ورماندى-دالا ساق اقسۇيەكتەرىنىڭ كيىم ۇلگىسىن زەرتتەۋگە تىڭ مۇمكىندىك بەرەدى. ارحەولوگتار ب.ز.د. VI عاسىردىڭ سوڭعى شيرەگىنە جاتاتىن وبادان شامامەن 30–40 جاستاعى ەر ادام مەن 18–22 جاستاعى جاس ايەلدىڭ جۇپ جەرلەنگەن ورنىن انىقتاعان. قابىر ەرتەرەكتە تونالعانىنا قاراماستان، ايەلدىڭ جانىنان سيرەك كەزدەسەتىن ورگانيكالىق بۇيىمدار – بىلعارى باس كيىمنىڭ قالدىقتارى مەن قولا اشەكەيلەرمەن كومكەرىلگەن بەلدىك فراگمەنتتەرى ساقتالىپ قالعان.
سونىمەن قاتار قازبا بارىسىندا قولا اينا، ويىن سۇيەكتەرى، قارا جىلتىر توستاعان جانە اعاش ىدىستىڭ بولشەكتەرى تابىلعان. ماماندار بۇل زاتتار ايەلدىڭ جوعارى الەۋمەتتىك مارتەبەگە يە بولعانىن ءارى بەلگىلى ءبىر عۇرىپتىق راسىمدەرگە قاتىسقانىن مەڭزەۋى مۇمكىن ەكەنىن ايتادى.
مامانداردىڭ ايتۋىنشا، ەجەلگى قورىمدارداعى بىلعارى سياقتى ورگانيكالىق ماتەريالدار سيرەك ساقتالاتىندىقتان، بۇل ولجا ەرەكشە عىلىمي قۇندىلىققا يە. رەستاۆراتورلار ارتەفاكتىلەردى ارنايى ادىستەر ارقىلى قالپىنا كەلتىرىپ، ولاردىڭ باستاپقى ءپىشىنى مەن قۇرىلىمىن ساقتاپ قالعان. زەرتتەۋشىلەر باس كيىمنىڭ تومەن ءارى تسيليندر ءپىشىندى بولعانىن، كوپتەگەن ۇساق قولا پلاستينالارمەن اشەكەيلەنگەنىن انىقتادى. وسىنداي تاسىلمەن بەزەندىرىلگەن بەلدىك تە تابىلعان.
عىلىمي زەرتتەۋ اۆتورلارى مۇنداي ساندەۋ تەحنيكاسى كلاسسيكالىق ساق مادەنيەتىندە بۇرىن كەزدەسپەگەنىن اتاپ ءوتتى. ونىڭ ۇقساستىقتارى ورتالىق ەۋروپانىڭ تەمىر ءداۋىرى ەسكەرتكىشتەرىمەن، اسىرەسە قازىرگى حورۆاتيا اۋماعىنداعى ەجەلگى مادەني داستۇرلەرمەن بايلانىستىرىلادى.
سونداي-اق دنق تالداۋى جەرلەنگەن ايەلدىڭ ورتالىق ەۋروپا تۇرعىندارىمەن گەنەتيكالىق تۋىستىعى بولعانىن كورسەتتى.
