اباي ۋنيۆەرسيتەتىندە 2026–2027 وقۋ جىلىنا ارنالعان قابىلداۋ ناۋقانى باستالدى.
بيىلعى مەكتەپ ءبىتىرۋشى تۇلەكتەر ءۇشىن ەلىمىزدەگى جەتەكشى پەداگوگيكالىق جوعارى وقۋ ورىندارىنىڭ ءبىرى سانالاتىن ۋنيۆەرسيتەتتىڭ قابىلداۋ كوميسسياسى ءوز جۇمىسىن باستادى. قابىلداۋ ناۋقانىنىڭ اشىلۋ سالتاناتىنا قر عىلىم جانە جوعارى ءبىلىم ءمينيسترىنىڭ كەڭەسشىسى رۋسلان ەمەلباەۆ، ۋنيۆەرسيتەت باسشىلىعى، قىزمەتكەرلەرى جانە تالاپكەرلەر قاتىستى.
20 ماۋسىمنان باستاپ ەلىمىزدىڭ بارلىق وڭىرلەرىندە جوعارى وقۋ ورىندارىنىڭ قابىلداۋ كوميسسيالارى جۇمىسىن باستايدى. بيىل رەسپۋبليكا بويىنشا 215 مىڭنان استام تۇلەك مەكتەپ بىتىرسە، 240 مىڭنان استام تالاپكەر ۇلتتىق بىرىڭعاي تەستىلەۋگە قاتىسىپ جاتىر. اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ قابىلداۋ كوميسسياسىنىڭ اشىلۋىنا قر عىلىم جانە جوعارى ءبىلىم ءمينيسترىنىڭ كەڭەسشىسى رۋسلان ەمەلباەۆ ارنايى قاتىسىپ، تالاپكەرلەرگە ساتتىلىك تىلەدى.
– بۇگىن رەسپۋبليكا بويىنشا جوعارى وقۋ ورىندارىنىڭ قابىلداۋ كوميسسيالارى ءوز جۇمىسىن باستادى. بۇل – ماماندىعىن تاڭداپ، شەكتى بالل جيناعان تالاپكەرلەر ءۇشىن ماڭىزدى كەزەڭ. سونداي-اق شىعارماشىلىق ەمتيحان تاپسىراتىن ۇمىتكەرلەر دە بۇگىننەن باستاپ ۋنيۆەرسيتەتتەرگە قۇجاتتارىن تاپسىرا الادى. مەملەكەتتىك ءبىلىم گرانتى كونكۋرسىنا قۇجاتتار 13–20 شىلدە ارالىعىندا قابىلدانادى.
بيىل اباي ۋنيۆەرسيتەتىندە تالاپكەرلەرگە ارنالعان كونسۋلتاتسيالىق ورتالىق جۇمىس ىستەيدى. بۇل ورتالىق تالاپكەرلەردىڭ بولاشاق ماماندىعىن دۇرىس تاڭداۋىنا، ومىرلىك باعىتىن ايقىنداۋىنا جانە گرانت كونكۋرسىنا قاتىسۋ ءۇشىن كورسەتىلەتىن ءتورت جوعارى وقۋ ورنىن ناقتى انىقتاۋىنا كومەكتەسەدى. كونسۋلتاتسيادان وتكەننەن كەيىن عانا تالاپكەر تەحنيكالىق حاتشىعا قۇجاتتارىن تاپسىرادى. سوندىقتان قابىلداۋ كوميسسياسىنىڭ بۇل جۇمىس الگوريتمى اتا-انالار مەن تالاپكەرلەر ءۇشىن ءتيىمدى بولادى دەپ سەنەمىن، – دەدى مينيستر كەڭەسشىسى.
ءىس-شارا بارىسىندا ۋنيۆەرسيتەتتىڭ اكادەميالىق قىزمەت جونىندەگى پرورەكتورى بانۋ ناربەكوۆا ءبىلىم بەرۋ باعدارلامالارىمەن تانىستىردى. ونىڭ ايتۋىنشا، وقۋ ورنى تالاپكەرلەرگە 157 ءبىلىم بەرۋ باعدارلاماسى بويىنشا كەڭ تاڭداۋ ۇسىنادى. ونىڭ ىشىندە باكالاۆرياتتا – 60, ماگيستراتۋرادا – 58, دوكتورانتۋرادا – 39 جانە لوتارينگيا فيليالىندا 8 ءبىلىم بەرۋ باعدارلاماسى جۇزەگە اسىرىلادى.
اشىلۋ سالتاناتىندا ءسوز سويلەگەن بانۋ مۇحاتايقىزى پەداگوگيكالىق باعىتتاعى ماماندىقتارعا تالاپكەرلەردىڭ قىزىعۋشىلىعى جوعارى ەكەنىن اتاپ ءوتتى.
– وتكەن جىلعى قابىلداۋ قورىتىندىسى بويىنشا رەسپۋبليكا كولەمىندە اباي ۋنيۆەرسيتەتىن 23 555 تالاپكەر تاڭدادى. ۋنيۆەرسيتەتكە 5 مىڭعا جۋىق مەملەكەتتىك ءبىلىم گرانتى ءبولىنىپ، 8 053 ستۋدەنت وقۋعا قابىلداندى. سونداي-اق ۋنيۆەرسيتەتتى تاڭداعان تالاپكەرلەردىڭ قاتارىندا 768 «التىن بەلگى» يەگەرى مەن 997 ۇزدىك اتتەستات يەگەرى بولدى. بۇل – ۋنيۆەرسيتەتىمىزگە دەگەن جوعارى سەنىمنىڭ جانە ساپالى ءبىلىم بەرۋدىڭ ناقتى ناتيجەسى، – دەدى پرورەكتور.
شارا بارىسىندا الەۋمەتتىك دامۋ جونىندەگى پرورەكتور ماقسات جاقاۋوۆ قابىلداۋ كەزەڭىندە تالاپكەرلەر تاراپىنان اكادەميالىق جانە الەۋمەتتىك ماسەلەلەرگە قاتىستى سۇراقتاردىڭ ءجيى تۋىندايتىنىن ايتتى. ونىڭ سوزىنشە، وقۋ اقىسىنا بايلانىستى الەۋمەتتىك جەڭىلدىكتەر مەن جاتاقحانا ماسەلەلەرى بويىنشا كەڭەس بەرىلىپ، بولاشاق ستۋدەنتتەرگە قاجەتتى جاعداي جاسالادى.
ايتا كەتەيىك، اباي ۋنيۆەرسيتەتىنىڭ قابىلداۋ كوميسسياسى الماتى قالاسى، قازىبەك بي كوشەسى، 30 مەكەنجايىندا ورنالاسقان. كوميسسيا دۇيسەنبى–جۇما كۇندەرى ساعات 09:00-دەن 18:00-گە دەيىن، سەنبى كۇنى 09:00-دەن 14:00-گە دەيىن جۇمىس ىستەيدى.
شىعارماشىلىق ەمتيحانعا تىركەلۋ 20 ماۋسىم مەن 6 شىلدە ارالىعىندا جۇرگىزىلەدى. ەمتيحاندار 7–12 شىلدە كۇندەرى وتەدى. ال مەملەكەتتىك ءبىلىم گرانتى كونكۋرسىنا قاتىسۋعا قۇجاتتار 13–20 شىلدە ارالىعىندا قابىلدانادى.
«Abai University» مەديا ورتالىعى
