2022 جىلعى قاڭتار وقيعاسى كەزىندە الماتىدا ينتەرنەت پەن ءموبيلدى بايلانىسقا قويىلعان ۋاقىتشا شەكتەۋلەرگە بايلانىستى قوزعالعان ءىس بويىنشا كونستيتۋتسيالىق سوت ءوز شەشىمىن شىعاردى، دەپ حابارلايدى "ادىرنا" ۇلتتىق پورتالى.
ءىس ماتەريالدارىنا سايكەس، الماتى تۇرعىنى بايلانىس قىزمەتتەرىنىڭ توقتاتىلۋىن تۇتىنۋشى قۇقىعىن بۇزۋ دەپ باعالاپ، سوتقا جۇگىنگەن. الايدا ءبىرىنشى ساتىداعى سوتتار ونىڭ تالابىن قاناعاتتاندىرماعاننان كەيىن ازامات كونستيتۋتسيالىق سوتقا ءوتىنىش بەرگەن.
سوتتاردىڭ شەشىمى «بايلانىس تۋرالى» زاڭداعى ۇلتتىق قاۋىپسىزدىك ورگاندارىنا شۇعىل جاعدايلاردا بايلانىس جەلىلەرىنىڭ جۇمىسىن، بايلانىس قىزمەتتەرىن جانە ينتەرنەت-رەسۋرستارعا قولجەتىمدىلىكتى ۋاقىتشا توقتاتۋعا مۇمكىندىك بەرەتىن نورماعا نەگىزدەلگەن. مۇنداي شارالار اۋىر جانە اسا اۋىر قىلمىستاردىڭ الدىن الۋ ماقساتىندا قولدانىلۋى مۇمكىن.
ءوتىنىش يەسى اتالعان نورما كونستيتۋتسيادا كەپىلدىك بەرىلگەن حالىقارالىق شارتتاردىڭ باسىمدىعى، سوت ارقىلى قورعانۋ قۇقىعى، ءسوز بوستاندىعى جانە اقپارات الۋ ەركىندىگى سياقتى قۇقىقتارعا قايشى كەلەدى دەپ ەسەپتەگەن. كونستيتۋتسيالىق سوت ءوز قاۋلىسىندا اقپاراتتى الۋ جانە تاراتۋ قۇقىعى ءابسوليۋتتى ەمەس ەكەنىن اتاپ ءوتتى. سوتتىڭ تۇسىندىرۋىنشە، بۇل قۇقىق كونستيتۋتسيالىق قۇرىلىستى، قوعامدىق ءتارتىپتى، ازاماتتاردىڭ قۇقىقتارى مەن بوستاندىقتارىن، حالىقتىڭ دەنساۋلىعى مەن ادامگەرشىلىك قۇندىلىقتارىن قورعاۋ ماقساتىندا زاڭمەن شەكتەلۋى مۇمكىن. داۋلى نورما قاۋىپتىڭ الدىن الۋعا باعىتتالعان پروفيلاكتيكالىق شارا رەتىندە قاراستىرىلعان.
سونىمەن قاتار كونستيتۋتسيالىق سوت قۇقىقتىق رەتتەۋدە بىرقاتار كەمشىلىكتەر بار ەكەنىن دە كورسەتتى. اتاپ ايتقاندا، بايلانىسقا شەكتەۋ ەنگىزۋگە نەگىز بولاتىن قاۋىپتىڭ ناقتى ولشەمدەرى ايقىندالماعان، «اۋىر جانە اسا اۋىر قىلمىستارعا اكەلۋى مۇمكىن» نەمەسە «كەيىنگە قالدىرۋعا بولمايتىن جاعدايلار» سەكىلدى جالپىلاما ۇعىمداردىڭ قولدانىلۋى قۇقىقتىق ناقتىلىقتى تومەندەتەدى. سونداي-اق نورمادا مۇنداي شەكتەۋلەردىڭ ۋاقىتشا سيپاتتا بولۋى ناقتى كورسەتىلمەگەن.
سوت ۇلتتىق قاۋىپسىزدىك ورگاندارى قابىلدايتىن مۇنداي شەشىمدەر كەيىننەن سوت باقىلاۋىنا جاتاتىنىن، ياعني ولاردىڭ قاجەتتىلىگى، نەگىزدىلىگى جانە تۋىنداعان قاۋىپكە سايكەستىگى سوت تارتىبىمەن تەكسەرىلۋى مۇمكىن ەكەنىن اتاپ ءوتتى.
ناتيجەسىندە كونستيتۋتسيالىق سوت ينتەرنەت پەن بايلانىستى ۋاقىتشا وشىرۋگە مۇمكىندىك بەرەتىن داۋلى نورمانى كونستيتۋتسياعا سايكەس دەپ تانىپ، ونىڭ قولدانىستا قالاتىنىن مالىمدەدى. سونىمەن بىرگە زاڭنامانى قۇقىقتىق ناقتىلىق تۇرعىسىنان جەتىلدىرۋ قاجەتتىگىنە نازار اۋداردى.
