2022 jylǧy Qaŋtar oqiǧasy kezınde Almatyda internet pen mobildı bailanysqa qoiylǧan uaqytşa şekteulerge bailanysty qozǧalǧan ıs boiynşa Konstitusiialyq sot öz şeşımın şyǧardy, dep habarlaidy "Adyrna" ūlttyq portaly.
Is materialdaryna säikes, Almaty tūrǧyny bailanys qyzmetterınıŋ toqtatyluyn tūtynuşy qūqyǧyn būzu dep baǧalap, sotqa jügıngen. Alaida bırınşı satydaǧy sottar onyŋ talabyn qanaǧattandyrmaǧannan keiın azamat Konstitusiialyq sotqa ötınış bergen.
Sottardyŋ şeşımı «Bailanys turaly» zaŋdaǧy ūlttyq qauıpsızdık organdaryna şūǧyl jaǧdailarda bailanys jelılerınıŋ jūmysyn, bailanys qyzmetterın jäne internet-resurstarǧa qoljetımdılıktı uaqytşa toqtatuǧa mümkındık beretın normaǧa negızdelgen. Mūndai şaralar auyr jäne asa auyr qylmystardyŋ aldyn alu maqsatynda qoldanyluy mümkın.
Ötınış iesı atalǧan norma Konstitusiiada kepıldık berılgen halyqaralyq şarttardyŋ basymdyǧy, sot arqyly qorǧanu qūqyǧy, söz bostandyǧy jäne aqparat alu erkındıgı siiaqty qūqyqtarǧa qaişy keledı dep eseptegen. Konstitusiialyq sot öz qaulysynda aqparatty alu jäne taratu qūqyǧy absoliuttı emes ekenın atap öttı. Sottyŋ tüsındıruınşe, būl qūqyq konstitusiialyq qūrylysty, qoǧamdyq tärtıptı, azamattardyŋ qūqyqtary men bostandyqtaryn, halyqtyŋ densaulyǧy men adamgerşılık qūndylyqtaryn qorǧau maqsatynda zaŋmen şekteluı mümkın. Dauly norma qauıptıŋ aldyn aluǧa baǧyttalǧan profilaktikalyq şara retınde qarastyrylǧan.
Sonymen qatar Konstitusiialyq sot qūqyqtyq retteude bırqatar kemşılıkter bar ekenın de körsettı. Atap aitqanda, bailanysqa şekteu engızuge negız bolatyn qauıptıŋ naqty ölşemderı aiqyndalmaǧan, «auyr jäne asa auyr qylmystarǧa äkeluı mümkın» nemese «keiınge qaldyruǧa bolmaityn jaǧdailar» sekıldı jalpylama ūǧymdardyŋ qoldanyluy qūqyqtyq naqtylyqty tömendetedı. Sondai-aq normada mūndai şekteulerdıŋ uaqytşa sipatta boluy naqty körsetılmegen.
Sot ūlttyq qauıpsızdık organdary qabyldaityn mūndai şeşımder keiınnen sot baqylauyna jatatynyn, iaǧni olardyŋ qajettılıgı, negızdılıgı jäne tuyndaǧan qauıpke säikestıgı sot tärtıbımen tekserıluı mümkın ekenın atap öttı.
Nätijesınde Konstitusiialyq sot internet pen bailanysty uaqytşa öşıruge mümkındık beretın dauly normany Konstitusiiaǧa säikes dep tanyp, onyŋ qoldanysta qalatynyn mälımdedı. Sonymen bırge zaŋnamany qūqyqtyq naqtylyq tūrǧysynan jetıldıru qajettıgıne nazar audardy.
